Faamautu e le Faamasinoga o Fanua ma Suafa le mataupu i le suafa Masinaalupe

Talosaga a le itu Tagi na taiulu ai le Lemalu Nele Leilua ma lo latou itu, na talosagaina ai le ofisa o faamasinoga mamalu mo le soloia o nofo a Moana ma Iese na faia faamalosi i le suafa Masinaalupe i Safaatoa o le ituaiga o Levi.
O le suafa Masinaalupe i Safaatoa Lefaga e tolu ona ituaiga e pei ona iai le iuga a le faamasinoga i le LC4814 P1-P26 i le 1997, lea sa faamaonia ai le tolu o Ituaiga o lenei suafa, e le toe feaiaa’i pe a faia filifiliga, ma maea filifiliga a le tino lava ia, ona logo lea o le o loo sinia i le suafa Masinaalupe mo le iuga o filifiliga.
O ituaiga e tolu e aofia ai suli o suafa Masinaalupe i Sauniatu, Levi ma Paeone.
E tolu itu o lenei faamasinoga e pei ona sa faataunuuina i le aso 16 o Novema. O le ituaiga i Levi o le suafa Masinaalupe lea sa mafua ai le faamasinoga. E lua itu tetee o lenei faamasinoga, o le itu tetee muamua e aofia ai Moana Galovale, Aleni Nonumalo Sofara ma isi i Safaatoa, o le itu tetee e lua e aofia a Folesi, Iese Lesu ma isi i Safaatoa lava.
O saofai a Moana ma Iese i le suafa Masinaalupe, na faataunuuina i le tausaga e 1999, ma faailoa ai i luma o le faamasinoga i le talosaga a le itu tagi, le faia faamalosi o nei nofo e lua, ae lei malilie uma i ai suli o le suafa Masinaalupe i Levi. A o lumanai ai saofai i le 1999 na oo atu ai le poloaiga le tumau a le faamasinoga i le nofo a Moana, mo le taofia o le faataunuuina. Peitai ane, na faataunuu lava, ma faapena loa ona oo atu ai malu o le malo mo le faamamaluina o le poloaiga le tumau.
O le finagalo a le Itu Tetee Muamua na o latou taua ai, sa iai Tualoaina Makesi o le tasi o le itu tagi i le tapaina o ipu ina ua faatino le talanoaga o nofo ua toe taofia nei. Ua maea foi ona folasia uma manatu o suli uma o Masinaalupe sa iai i le talanoaina o ia nofo. O i latou e lei auai o Masinaalupe Tautasi ma isi.
O le isi vaega o le latou finauga ua maea faasalalau i luga o le leitio – o lou le auai o le a le avea lea ma mafuaaga o le toloa o se faaiuga i le aso lava lea na talanoaina ai lenei mataupu.
O le Itu Tetee lona lua, ona pau le latou talosaga na faia ina ia faaaoga le matai Masinaalupe ia Iese. O le aso o le talanoaga le aso 7 o Aukuso i le 1999 na taua ai e se isi o le itu lea o Folesi Taituuga, na osofai ai o ia e Lemalu Nele o le itu Tagi. E lei faaaogaina e le Faamasinoga lea faamatalaga.
O le iloiloga lenei na mamafa lava le sailiga a le Faamasinoga i le faapogai o lea nofo e pei ona maua ai o nofo e pei ona talosagaina le taofia na faapogaia e Masinaalupe Tautasi.
O le iuga la o lea mataupu e tumau pea le faaiuga a le Faamasinoga ua taua o le LC4814 P1-P26 i le 1997, lea sa faamaonia ai le tolu o Ituaiga o lenei suafa, e le toe feaiaa’i pe a faia filifiliga, ma a maea filifiliga a le tino lava ia, ona logo lea o le o loo sinia i le suafa Masinaalupe mo le iuga o ia faiga filifiliga.
O le maea ai ona tolaulau le iuga na malilie ai itu uma e tolu o le a toe talanoa mafuta i lenei vaiaso ae o le a fuafua ai foi ma se aso e atofa ai se Talanoaga a le Aiga aua le toe faaleleia o le va nonofo ai ma le faaleleia atili o le aiga.