Faama‘umaga fanuatanu o Vaiusu

Ole aso 21 ole masina lenei o Ianuari ua tuu atu ele pulega ale afioaga o Vaiusu ile aiga o Inu Lui Gafatasi e ana le ma‘umaga i luga o fanuatanu, e ati ese ai a latou meatotō.

Ole Aso Toonai na tea nei, 7 Ianuari 2017 na fono ai le nuu o Vaiusu ma asia ai e matai le fanua oloo taooto ai nisi ole nuu.

E molimauina ele aiga e ana le ma‘umaga o talo, fa‘i, taamu ma ufi, ua silia ma le 45 tausaga talu ona soifua i lea fanua ae leai se isi o latou na vaai ise maliu o teu i lea fanuamaliu vaganā ai lava tuugamau maa ma tuugamau faasima e tolu oloo iai. Sa molimauina ele aiga se liutofaga na faia.

Na talanoa Inu, ole mataupu tau ile fanua lea e aofia ai ma le eleele o iai le fanua maliu, oloo taatia nei ile faamasinoga le talosaga toe Iloilo (apili) a lona aiga ma oloo faatali nei mo se taimi e valaau ai lea talosaga.

I faamaumauga ale faamasinoga, LC 2776 P4, e uiga ise vaega ole fanua o Tuvao i Vaiusu Faleata.

Na talosaga ai le itu a Seiuli Saoaumaga Patau Lino ma isi, ile faamasinoga mo sana poloaiga e faasaga ile itu tetee.

1: Ia tala ese uma fale ole itu tetee.

2: E leai se tautua o faia ile Sa‘o.

3: E leai se talosaga aloaia ale itu o faasaga iai le talosaga, ae na avane le latou tala tusia mo le suesueina ole mataupu.

“Aumai i lalo matou niu, koko ma ufi”

Ole tulaga ile finagalo ole nuu ina ia ati ese a latou meatotō ma le fanua, na talanoa Inu, e leai se isi e fai loto ile finagalo ole nuu.

“Afai lava ole manaoga lea, e toe tuu lava iai e faatino le finagalo ole nuu. Ae e leai ma se matou mea e aveesea, auā ole matou aiātatau, a omai ole ā le latou finagalo, oute talanoa iai, o mai outou e faatino le tou finagalo, ae talofa i lo‘u nuu ne‘i iai se isi e tupu ai se mea.”

O fetuunaiga, ole 9 eka na talosaga ele matou toeaina ile malo e aumai e fai ai fanuatanu, ona aumai lea ele malo ole fanua i lalo mai ole mati‘e. O fanua na o fanuatanu sa‘o lava na ole nuu, ae lē ose fanuatanu le mea lea.

O fesuiaiga a toeaiina mai augatupulaga ua mavae, na talosaga ai Seiuli ile matou toeaina, e fai ii le fanuatanu, e latalata i na aso e fua ile amoina o tagata i taimi ole leai oni taavale. Na malie le matou toeaina, e o matou e galulue i gauta ane ole fanua lea ma fanuatanu.

Ole faamatalaga a Inu, o upu tuugutu mai i mātua, ae lē iloa ni tausaga o na fetuunaiga.

Alu a‘i alu a‘i, maliu Seiuli Toe, maliu ma le matou toeaina, (tamā o lo‘u tamā) ae tulai mai loa Seiuli Maua. Ole uso o lo‘u tamā e matua e igoa ia Ioane, na taofia le toe teuina mai o ni tagata ile matou fanua. Na taofi mai ai lava e lei toe teuina lava se tasi ile fanua lenei. E leai se faapepaga na faia i na tala, ua na‘o ni maliega faigutu.

Ole susuga Inu, ua 41 ona tausaga, ae lei vaai ise isi na toe tanu ile fanua lea. Ole maliu mulimuli lava na teu ile fanua lea, oloo manatua e lo‘u tamā pe ā ma le 45 tausaga talu ai.

O Gafatasi ua 74 tausaga le matua, ole tamā o Inu Lui na talanoa mai, faapea, o eleele nei o matou eleele, na taofia e lē toe teuina ai se maliu ile fanua lea. E toalua la‘u fanau pe ole vaitausaga ole 1968-1969 le taimi mulimuli na vaai ai Gafatasi o teu se maliu ile fanuatanu lea.

Ole mau a Inu, afai ae finagalo le nuu e ati ese a latou ma‘umaga, e tuu lava le avanoa iai e latou te faatino ai lo latou finagalo.