O se tasi o alo o Samoa, le tamaitai o Sera Chan-Cheuk Moss, na faimalaga mamao mai lava i Miami Florida i le Iunaite Setete o Amerika, mo se fuafuaga faapitoa i Niu Sila.
Ma o lenei fuafuaga faapitoa e faataunuuina i le Aso Lulu, 9 o Setema 2015, o le tatalaina aloaia ma faalauiloa lana uluai tusi ua ia tusia ai tala mo fanauiti ua faaigoaina, “Pepe the Butterfly Girl”.
Peitai e iai se sootaga sili ona vavalalata i le loto o Sera, na naunau ai lava ina ia malaga mai i Niu Sila e faatino ai lea faamoemoe tāua.
O lenei tusi o loo faamatala ai e le tamaitai tusitala se tala faamomoiloto e uiga i si ona tuaa tina ua 98 tausaga le matua o lona soifua, le tina ia Pepe Matalena Ah Kiong Chan-Cheuk.
O ata mananaia ma le felanulanuai i lanu o atumotu o loo iai i lenei tusi, sa tusia ma valivaliina e le nephew o le tamaitai tusitala, le alii o Vincent McCarthy o se grandson foi o le tina matua ia Pepe, ma o Vincent e nofo o ia i Taranaki, Niu Sila.
O se tala o loo faamatilatila ai le alofa, le lototele ma le faatuatua o se teineitiiti na ola ma soifua ane i le motu o Manono i Samoa.
E faigata le olaga na fetaiai ma lenei teineitiiti, o “Pepe the Butterfly Girl” i lona ola ane i lenei motu, aemaise lava ina ua maliliu faafuasei uma tagata o si ona aiga i se afā matautia.
Peitai o le malosi o le faatuatua o lenei teineitiiti i le Alii ma lona mafuta i lana Tusi Paia, o ina na sulufai i ai Pepe e lē gata mo le aoaoina o ia, ae o le puna lena o le faafouina o lona malosi, ma avea ma maluapapa o lona olaga atoa.
O se tala o ni mea e mautinoa ua tofo foi i ai ma tutupu i le tele o isi aiga Pasefika. O le oo mai la o Sera Moss i Niu Sila nei, ina ia faalauiloa aloaia lana tusi faatasi ma lona aiga, le Chan-Cheuk family, aemaise lava i si ona tina matua, i lo latou aiga i Mangere Bridge, i Aukilani.
O le afioga ia Patele o le Ekalesia Katoliko, Father Vilo Hansell, o ia foi o se uo mamae a le aiga, na taitaia le sauniga e momoli ai le talosaga faafetai i le Atua ma faamanuiaga mo le tatalaina aloaia o le tusi.
O le tamaitai tusitala o Sera Moss, faapea foi Vincent McCarthy na ia tusia ata o lenei tusi, “Pepe the Butterfly Girl” na soifua pe na fananau uma ane lava i laua i Samoa.
Ua iai le faamoemoe o Sera, o se taimi e latalata i le faaiuga o le tausaga fou, 2016, o le a faalauiloa mai ai i tua le lomiga lona lua o lenei tusi i le soifuaga o “Pepe the Butterfly Girl”.
Ua maua nei le tusi pe a agai i le Amazon.com, Barnes&Noble.com ma isi faletusi i soo se atunuu.
