E le galo i tagata Samoa le tautua ale kamupani ole Yasaki sa faafaigaluegaina le toatele o tagata ole atunuu ile 26 tausaga sa iai i Samoa. E le galo foi ile Palemia susuga Tuilaepa Lupesoliai Sailele Malielegaoi, le taumafaiga ale Malo e aumai le kamupani i Samoa ona ole silasila ini avanoa e maua ai galuega a tagata ole atunuu.
Ole maualuga ole sao ole Yasaki ile tamaoaiga o Samoa ma ona tagata ole a galo ae mo le faia ose pine faamau o lea agalelei na a’e ai le finagalo ole susuga Matai’a Lynn Netzler ma lona nuu o Vaitele e faaee se suafa matai o lona nuu e faailoga ai le tele o tausaga o tautua le kamupani i Samoa aemaise o eleele o Vaitele oloo iai le kamupani.
Ole taeao sesegi ole Aso Faraile na tea nei na faatumulia ai le nofoaga ole kamupani i Vaitele ile mamalu ole afioaga o Vaitele ile susuga ole Tama ale Fale le susuga Matai’a Lynn, le afio ole Aloalii o Galumalemana, le afifio o Tupuola, Tagaloa ma Siliga faapea le fetalaiga Toi, Pula ma Lealailepule ile faatinoina ole faaaloalo ole faaee lea ole suafa Tagaloa ile atalii ole Peresetene ole kamupani le afioga Tagaloa Ryosuke Yasaki lea na malaga faapitoa mai ile tapunia aloaia o galuega ale kamupani ile Aso Faraile ua mavae.
Na faaalia ele fofoga ole kamupani ile fesagaiga ma le nuu ile faafotu Tupu ole alo ole Pelesetene ole kamupani, sa molimanao le alii e fia matai e pine ai le mae’a ole tautua ale Yasaki i Samoa ma avea ai foi ma faailoga ole 26 tausaga o galue le Yasaki i Samoa.
Ole usu faaaloalo a matai o Vaitele na laga faatau ai le tofa Toi Sakaria ma o ia lava na tasi iai le sivaloa ma le faatau paia e lauga e faapaia le nofo ale afioga Tagaloa Ryosuke Yasaki. O faaaloaloga na maau iai le Nofo ma le kamupani na sasaa atu ai seleni ma faia ai faaaloaloga masani mo le afioga ile Sa’o ole nuu faapea Tamalii o Vaitele tainane o tulafale faiupu ole nuu ma le lautele o matai tautua ma le nuu na auai.
Ole po ole Aso Faraile lava lea na faia ai le fiafia tele ale kamupani ile Falemataaga o Lopati Sitivinisone i Vailima e faamae’a aloaia ai le tautua ale kamupani i Samoa. Ole Aso Faraile foi ua mavae na maua uma ai faamanuiaga tau seleni ale au faigaluega e silia ile onoselau. Ua na’o se vaega o tagata faigaluega ole a faaauau pea ona galulue e tapena nisi o vaega a’o lei tuua ele Yasaki Samoa ile masina o Oketopa ole tausaga nei.
E tolu ni kamupani ole a faagaioia ile nofoaga sa faaaogā ele Yasaki e aofia ai le kamupani fau moega ma faamalu mai Niu Sila ole Sleepwell International e umia e nisi o tama fanau a Samoa.
Ole a iai foi ma se kamupani e gaosia le uaea mo masini faatekonolosi, ma le kamupani a Frankies ole a faaaogāina se isi vaega ole nofoaga. Ole a maua ai foi ma avanoa faigaluega mo tagata sa galulue ile Yasaki.
