Faamasino Afega poo ai e pule i le fanua ua tu ai le Maketi

E lei leva nei talu ona tatala ma faaaogā le maketi o le afioaga o Afega ua faatau ai soo se fua tau faatoaga o taumafaiga a le nuu faapea alalafaga tuaoi. O se galuega na fesoasoani i ai le Malo o Iapani i lona faatupeina. Peitai e ui i se faamoemoe o alii ma faipule e unaia lea atinae mo le manuia o tagata, ae ua i luma nei o foga a le malo poo le faamasinoga se finauga poo ai tonu e iai le pule o le eleele ua tu ai le maketi.

 
O se eleele e pei ona silafia e le toatele o le tatou atunuu sa iai le falemai faaitumalo poo se District Hospital ua tapunia ma ua tala ese foi le falemai sa iai. E lata le eleele i le vai taele o le afioaga e toetoe lava faafesagai ma le malumalu EFKS i le ituala i uta, ae o le ituala lava i tai o loo iai lea eleele o loo iai le malumalu o le ekalesia Metotisi e toetoe lava faafeagai tonu ma le malumalu EFKS o Afega.

 
O le vaiaso na tea nei na valaau ai se mataupu a le afioaga i le faamasinoga e faasino i se faiganuu fou e mafua ona ua vaeluaina le afioaga ma ana pulega nuu. O le fausia o le maketi i le eleele ua finau ai, ua ta‘ua e se molimau o le isi lea pogai o le va o le fogavaa ma lua ai faiga nuu. O le mataupu lea na lotea e le faamasinoga o fanua ma suafa ma ua poloaina ai itu uma sa finau e toe ave le gasegase a malo o le afioaga e soalaupule i tua. Na mae‘a lea mataupu ae sosoo atu loa ma le finauga i le eleele ua tu ai le maketi.

 
E tuuina atu lenei lipoti mo le faasalalauina o loo faagasolo taualumaga a le faamasinoga i le suesueina o itu tagi ma itu tetee. O se molimau ua oo mai e lei faamaonia, o le vaiaso fou lenei e ono aumai ai se faaiuga o le finauga i le pule o le eleele ae poo ai foi e faasino tonu i ai. E lē o se taimi muamua lenei ua oo ai ni mataupu a lenei afioaga i le faamasinoga e pei foi o isi nuu o le atunuu. Talosia i se finagalo o le faamasinoga i le finauga o le a maua ai se nofo filemu o alii ma faipule ma fealofani ai pea tagata o lea afioaga.

 
O le afioga Savea Sano Malifa o loo taiulu i se tasi o itu o le faamasinoga, ae o le tofa Maulolo Tavita Amosa o loo taitaia se tasi o itu lea o loo tuaveina le mau a alii ma faipule.
Sa tumutumu le paia o le afioaga i le vaiaso na tea nei i le mota faamasino i Mulinuu i le tapuaia o le gasegase a malo o le afioaga. O upu masani a le atunuu, e lē po ai pea se nuu.
E ui lava ina eseese taofi ma manatu o ni itu i se finauga, ae e sau malama o le aso fou e toe faatasia ai ma maua le galulue faatasi.Se vaaiga i le maketi o le afioaga o Afega e lei leva nei talu ona tatala ma ua faaaogā e lē gata o tagata o le nuu a o le lautele o le atunuu aemaise i afioaga tuaoi e faatau ai fua o a latou faatoaga