O le Aso Tofi nei o loo faatali i ai le lauina o se faasalaga o Le Mamea Emosi Puni
O le tetee o Le Mamea Emosi Puni, o se tamalii matua na molia e leoleo i lona fasi mate o ni manu papalagi (povi) a se isi tagata ona ave lea faatau i se fale fasimanu poo se butchery, o se solitulafono ua mae‘a nei ona suesueina molimau ma ua faamaonia pea moliaga.
O Fepuari o le tausaga nei i Pu‘apu‘a na tulai mai ai lenei gaioiga ina ua fiu le susuga Siaosi Apelu o Pu‘apu‘a i Savaii e saili lana povi pulu, o se povi taanoa ma le tamai povi faatoa fitu masina le matua ua lē iloa poo fea ua savavali i ai.
O le molimau a le alii 16 tausaga o Faatauva’a Siaosi le talii o le e ana povi, e faapea e lalata tele a latou manu. O le lalata o povi ona sa faafagafao mai lava i le taimi o laiti seia oo ina lapopoa ma e faapea foi i le tamai povi.
O le Aso Toonai 15 o Fepuari 2014 na alu ai le alii o Fatauvaa e sui a latou povi, ae o le Aso Gafua 17 o Ferpuari 2014 na alu ai lona tamā o Siaosi e toe sui, ae alu atu ua leai povi i le nofoaga sa noanoa ai.
O le povi pulu ma le povi taanoa sa nonoa i le maea tuaiti lanumoana ae o le tamai povi e lē nonoaina ona e lata i lona tina. O le Aso Lua na amata saili ai povi seia oo ina oo i le Aso Lulu 19 o Fepuari, agai loa i le pulenuu mo se fesoasoani, lea sa latou agai ai ma nisi o matai i se taavale i le alu agai i Vaiaata ma Patamea peitai e lei maua ai lava ana manu papalagi.
O le Aso Toonai 22 o Fepuari na tuusa‘o ai loa le sailiga i le ofisa o leoleo i Tuasivi ma faaulu lana tagi ma sa ia talosagaina ai foi ma se fesoasoani mai leoleo mo le sailia o ana manu.
O le sailiga ma suesuega a leoleo na latou tapa ai se tusi faataga faaletulafono poo se search warrant e sailia ai le atinae manu papalagi ia poo le pa povi a le afioga Le Mamea Emosi Puni.
O taualumaga o suesuega a le faamasinoga i molimau a leoleo i le mataupu lenei na faailoa ai e ni alii pagota sa tuli faasalaga i le falepuipui i Vaiaata e faapea, o le Aso Lua 18 o Fepuari.
O molimau a Ionatana Malaki ma Atalili Fiti na la faailoa ai o le taeao o le aso lea na oo atu ai lē ua molia ma talosagaina se fesoasoani a ni pagota se toalua mo le faalaloina o ana povi mo se faalavelave.
Peitai e ese le faamatalaga a ia pagota e toalua ma le molimau a Le Mamea Emosi na faia i le faamasinoga sa ia ta‘ua ai na mafua ona oo i le falepuipui i Vaiaata mo ni pagota latou te ave totoga o povi e faamamā ma ave e fai ai le latou meaai i le falepuipui ona o le mea foi lea na fai i nisi o ana povi sa faalalo muamua.
O le taunuuga o suesuega o molimau o le mataupu lenei na seei ai le afioga i le faamasino sili, na faaaogāina ai molimau a Ionatana ma Malaki i le faamatalaina o lanu o povi ma faailoga sa faailoga ai, ma e ogatasi lelei ia molimau ma molimau a lē e ana povi na leiloloa ma lona atalii.
Na molimau foi ia alii pagota e faapea na taunuu i le pa povi a lē ua molia ma faatonuina loa i laua e faalalo manu i se laau malosi. Na molimau foi i laua i le oo atu o le taavale a se tasi o tagata faipisinisi ma ave ai vaega o povi e lua na faalalo.
O se pisinisi e faatau ai aano o manufasi e pei o povi na faatau i ai povi na faalalo ma ua faamaonia e le faamsinoga o manu papalagi ia a Siaosi na leiloloa. O le tamai povi na maua i se nofoaga ua mate ma sa maua ai ni manu‘a e masalomia e mafua i se pulufana, peitai e lei maua e leoleo ia latou suesuega se totoga o le pulu.
O le tau o le povi pulu e $1,200 e faapena le tau o le povi taanoa, ma le tamai povi e $600 tala. Sa teena e lē ua molia le moliaga o le fasi mate o manupapalagi ma le faamoemoe e ave faagaoi ae ua faamaonia lava moliaga, ma o le Aso Tofi o le vaiaso nei e lauina ai se faaiuga a le faamasinoga i se faasalaga mo lē ua molia.
E pei ona silafia o le afioga Le Mamea Emosi Puni sa faamaonia sona moliaga o le faaoolima matagā na tuli ai sona faasalaga e 12 masina i le falepuipui.
