Ose tala fiafia mo Sa‘u Patrick Tuipulotu, ua mae‘a suesuega ale All Blacks ma le New Zealand Rugby (NZR) i lona faaaogāina o fualaau faasāina ile masina o Novema, lea na faamalolo ai o ia mai le malaga taamilo ale All Blacks i Europa.
Ole faaiuga: E lei faaaogāina e Tuipulotu se fualaau faasāina. Ole faaletonu o masini suesue ale Sports Medicine Research and Testing Laboratory (SMRTL) i Salt Lake City lea na faia suesuega ile “A Sample” ma le “B Sample” a Sa‘u. Na mafua ai ona sese le lipoti na mafua ai ona faamalolo Sa‘u Patrick Tuipulotu mai le All Blacks.
Ua faailoa ai ma le fiafia tele o Sa‘u ile faamaonia o lona sa‘o. Ile faamalolo ai o ia mai le malaga ale All Blacks, na toe foi ai i Niu Sila ma le loto mafatia tele ile faaiuga sese na masalomia ai o ia.
E lē gata ile faatea o ia mai le malaga ale All Blacks, ae na faasāina foi Sa‘u ele NZR ona toleni ile Auckland Blues mo le Super Rugby 2017.
“Na matuā faateia o a‘u ile taimi na ta‘u mai ai le faaiuga ale All Blacks. E lē ose mea faigofie. E fai lava si umi o faavasega lo‘u mafaufau ile mea na tupu, ae o lea ua uma lenei popolega sa nofo ma a‘u,” saunoaga a Sa‘u i lana talanoaga ma le TVNZ. Ole faigata ole faasalaga ale NZR, ona sa faasāina ai o ia mai le Auckland Blues.
“E lei faigofie foi le faasāina o a‘u mai le Auckland Blues. Na fai lava a‘u toleniga na‘o a‘u. Ae na aogā foi lea na maua ai isi lesona mo a‘u ile toleni toatasi.”
Na ta‘ua e Sa‘u, ile maua ai ole tala mai le All Blacks, na ia taumatemate ai poo le ā le taumafa ae ose mea na ia faaaogāina e inu pe taumafa, na aafia ai lana “A” ma le “B Samples”. O lea foi la na manatu faamaualuga ai lava o ia e lei faia e ia se mea sese.
Ae e tusa lava poo le ā le faafiti ale tagata taalo, ae faalagolago lava le NZR ma le All Blacks i faaiuga a Fale Suesue faapitoa e iai le WADA ma le Sports Medicine Research and Testing Laboratory lea na faia suesuega i “Samples” ia na faatasi ai ma le “A” ma le “B” a Tuipulotu.
Ole suesuega muamua na maua ai le faaletonu ile “A Sample”. Na toe sailia foi ma le “B sample” ae toe foi mai lava e faaletonu. Na faafiti pea le alii lakapi e nate lei faaaogāina se taumafa, fualaau poo se meainu ua faasāina i lalo o tulafono ale WADA ma le NZR.
O lea na toe suesueina ai ma le “B Sample” ma le faamaoniga mai le SMRTL e sese le latou faaiuga, e leai se faaletonu i “Samples” a Tuipulotu.
Ile faamatalaga faaopoopo ale SMRTL na ta‘ua ai le faate‘ia foi o latou ile faaletonu ole latou metotia ma le faaiuga. Na faapea mai foi le ofisa, e seāseā faaletonu faapea suesuega ale SMRTL.
Na faaaogā ele SMRTL le faaupuga faapea, e taitasi ile 10,000 suesuega e faaletonu. E iai la le suesuega ia Sa‘u Tuipulotu.
Ole tautinoga ale SMRTL ole a matuā sailiili iai pe aisea na faapea ai le faaletonu ole latou suesuega ia Tuipulotu ina ia taofia ai faaletonu faapenei mai le toe aliali mai.
O nei sailiiliga uma e ao ona to ai le pulou ile puipuiga o Patrick ele NZR. Ile maua ai ole ripoti muamua ile masina o Novema na faamalolo ai le alii taalo, e aunoa ma se faaiuga ale NZR ile faateaina o ia.
E lē ole NZR foi na faaleleina le tala ile vaiaso na tea nei ile sailia o Tuipulotu ile faaaogāina o fualaau faasāina. O lea tala na maua mai i suesuega ale Fairfax Media. O lea na faatoa faamaonia ai ele NZR ma le All Blacks le mea na tupu i Europa.
Ile lagolagoina o Sa‘u Tuipulotu ele NZ Rugby Players Association, na faailoa ai e Rob Nicholls e lei vavevave se faaiuga ale NZRPA ile faaiuga muamua ale NZR “auā e telē le eseesega ole A ma le B Samples”.
Oloo saili foi ele NZRPA poo ā aafiaga o Sa‘u i tulaga tau tupe maua ona o nei sailiga sese na tuua‘ia ai le alii taalo. O lea fesoasoani ale asosi ia Patrick e toe maua uma ona totogi na aafia i taimi na fai ai suesuega.
Ae ole Auckland Blues, ua matuai faaalia le fiafia o Tana Umaga ile faaiuga fou ale NZR ua faamamā ai le igoa o Sa‘u Tuipulotu. “Ua fiafia tele le ‘au ile toe foi mai o Patrick. Ua sauni foi le ‘au e toe faaauau toleniga a Tuipulotu ile Super Rugby.”
Ae ole tala mulimuli mai ia Tuipulotu, e telē lana galuega ole a toe fai e toe foi ai ile tulaga ua tatau ona iai lona malosi mo le Super Rugby. E ui na tamoe ma toleni, ae e iai lava mea e misi ile tapena toatasi, e iai le faatautino e toe faamasani, e pei ole natura lea ole taaloga.
E 12 taaloga faavaomalo a Sa‘u mo le All Blacks ae 34 taaloga Super Rugby mo le Auckland Blues.
