Faamaonia le mau a Jay Lagaaia e faailogalanu TV Ausetalia

O le sauni atu o Samoa e faailoga lona Iupeli Auro i Apia ua avea ma taiala i le loto sailimalo o ana tamafanau i soo se vaega o le lalolagi o loo aumau ai.

I Sini nei ua na o le alo o Samoa ia Jay Lagaaia mai le ata faasolo o le Home and Away na faaali sa‘o lona lē malie i le tulaga o le faailogalanu o faiga a TV i Ausetalia nei.

Na mafua ona sasao le toatamai o Jay Lagaaia  ona o le faamuta leaga o lana Konekarate e le Ala Ata Fitu. Na amata lea ma itu e fesiligia ai le faaaogāina pea e Ausetalia o le tulafono tuai o le “White Australian Policy” lea e faamamafa ai lava le faamuamua i na o tagata Papalagi i soo se vaega o le soifuaga.

O le 99.9% o tagata faasalalau i luga o Alaata 7,9,10 ma le ABC o tagata Papalagi vaganā ai le SBS o loo maua i ai nisi tagatanuu o Ausetalia e lē o ni papalagi. O lea faamaumauga ua atagia ai le eseesega o loo iai nei Ausetalia ma Amerika e oo lava i Hollywood.

Ua amata foi ona talanoa ai mātua Pasefika ina ia aua le avea nei faiga faaituau ma mafuaaga o le sese ese ai mai o latou sini taitasi auā le lumanai.

O Timana Tahu na iloga lona faaseā ia Andrew Johns talu ai tala faailogalanu a Johns ma viia ai le toa o Tahu.

O Tauvaga Pese iloga e pei o le Australian Idol, X-Factor ma le Australia’s Got Talent ua leva ona tatau ona suipi ai nisi o fanau talenia o Samoa e auai. Aepeitai, e foliga mai e tusa lava pe selau pasene le siufofoga ma le siva a tamafanau a le atunuu e tauva, e faamuamua lava le isi vaega faaletonu.

E atagia ai i palota a tagata lautele e tusa lava pe maoa‘e se alo Samoa, e filifili lava e papalagi sui tauva papalagi.

O nisi o faataitaiga iloga i Tausaga e tele ua tuanai, e aofia ai Anne Robertson, Emily Williams faapea Marina Davis. E toatele nisi e talitonu o le siufofoga matagofie o Marina Davis na tatau lava ona sao atu i le tolu pito i luga  ma manumalo aepeitai na sao Rys Mastin ma manumalo i le X-Factor.

Pau le taimi na sao ai nisi o Alo o Samoa ma Tonga i se Siamupini o le X-Factor i le 2004 lea na suipi ai le ‘Random’e pei ona fiu faamasino e tau titina le ‘Random’ae na maofa Ausetalia i le pepese ma sisiva pei o Michael Jackson a nei fanau mai Brisbane.

E ui o le faigata, na saunoa se tasi tamaitai Talavou Samoa i Sini ia Robbagioleen Senealiifa, e sefuluono tausaga e ui na lē sao atu i totonu o le X-Factor i le vaiaso talu ai o le a toe taumafai i le 2013.

O le 2002 na tuua ai e lona aiga Samoa mo Ausetalia ma avea ai o ia ma Idol a Claymore Public School i Campbelltown. O le 2010 na toe siamupini ai i le 2010 i le Bass Hill High X-Factor.

Ua lē avea le faailogalanu i luga o nei tauvaga i le TV ma mafuaaga e tineia ai le lotonuu o fanau Samoa i Sini. O le viiga lea i le Atua a o sauni atu Samoa e faamanatu lona 50 tausaga talu ona Tutoatasi mai i pulega faakolone.