E toalua alii talavou e uo lelei i laua. Na manao le isi ile polokalame ile telefoni feaveai a lana uo, ma faapea ona ave iai e lana uo lana telefoni. Ole mea na tupu e toe faafoi ane le telefoni ma siaki atu ele taulealea ua maliu, ua uma lana paleni poo le credit ona faaaoga e lana uo.
Na toatamai ai loa ma teva ma savali agai ile aualatele. Na mulimuli atu lana uo ma faamalie iai, ae ua lē mafai lava le ita ma sasa ai loa le po i foliga o lana uo. Na tulai mai ai loa le feseeseaiga aapa ane loa le alii na faaaogāina le paleni ole telefoni ma lia‘i atu se maa ma lavea ai le ulu o lana uo.
Na palasi toele o ia i luga ole auala ma tau tonu ona foliga i luga ole palapala. Na nanati atu ile falemai mo se laveai ae na siliga taumafaiga a fomai ma maliu ai lava. O Me ole tausaga ua mavae na tulai mai ai le faalavelave lenei i Samusu tai.
Na oo i leoleo ma faia ai le suesuega ma molia ai le alii ua taofia ele faamasinoga ona faailoa lona suafa. Sa nofo aoga ile nuu o Vaipuna ae o faaiuga o vaiaso e alu ai ilo latou aiga i lo latou nuu moni.
Ole tasi o faaiuga o vaiaso na alu ai i lo latou aiga na tulai mai ai loa le faalavelave ua uma ai le ola o lana uo tama sa aoga foi ise kolisi maualuga. E 14 tausaga ole taulealea ua molia ma e toetoe lava tupulaga lelei ma lē ua maliu. Na faaalia ile faaiuga ale afioga ile tamaitai faamasino ole Faamasinoga Maualuga, Mata Keli Tuatagaloa, ua silasila ile faia ose faasalaga faafalepuipui ona e itiiti tausaga o lē ua molia aemaise e lelei lipoti sa tuuina atu e lana faifeau, ole pulenuu faapea lana aoga.
E pau le tulaga ogaoga ole solitulafono ole maa na ia umia ose aupega na faaoo ai se gaioiga ua mafua ai le maliu o lana uo. Ua silasila foi le faamasinoga e talia le tautinoga a lē ua molia o lona loto salamō moni, ona sa leai sona faamoemoe ole gaioiga na ia faia e oo ai le maliu ise isi tagata.
Na faatāua foi ele faamasinoga le Ifoga na faia e lē ua molia ma lona aiga lea na ave ai tulaga masani o toga ma tupe, aemaise sa fesoasoani foi lona aiga i tapenaga ole maliu.
Sa finauina e leoleo se faasalaga faafalepuipui ona ole ogaoga ole solitulafono ua uma ai le soifua ose isi tagata. Peitai ole silasila ale faamasinoga ua lē talafeagai sea faasalaga ae ole a tuu le avanoa i lē ua molia e toe fuataina ai lona tagata e ala ile nofo vaavaaia mo le lua tausaga.
Afai e toe aafia ise soligatulafono i totonu ole 2 tausaga lea ole a toe suia loa se faaiuga ale faamasinoga. Ole avanoa foi lea ua tuu atu ele faamasinoga ile alii talavou e faaauau ai ana aoaoga.
