Faamaonia le faiaiga faamalosi i lona afafine

“O taimi e inu pia ai lo‘u tama e faatino ai lana amio leaga ia te au”

Na tagi ma tau lē mafai ona fofogaina le molimau a le teineititi 15 tausaga le matua, a o ia faamatala le gaioiga a lona tamā moni na faatino ai se faigaaiga faamalosi ia te ia, lea na faaalia e le itu a leoleo e faalua ona faatino lea solitulafono i le masina o Aukuso, ae faatasi i le masina o Tesema o le tausaga ua mavae 2009. Na lologo le potu faamasino numera 3 a o faamatala ma loimata e le teineititi le la mafutaga ma lona tamā. “Ou te lei vaai lava i lo‘u tina talu ona ou ola, ma ou te lei feiloai foi i ai. O lo‘u tamā lava na ia tausia a‘u seia oo ina ou matua ma ou alu i le aoga”. O le faamatalaga a le teineititi na vaaia ai le toulu o loifofoga o nisi o le aufaafofoga faapea le laulau o faatonu na faamasinoina molimau.

O se nuu i Savaii sa nonofo ai lē ua molia ma lona afafine. Ua lē mafai ona faasalalauina le nuu ma suafa o i laua ona o se poloaiga a le faamasinoga i le fia puipui i aafiaga o le teineititi.

Na molimau le teineititi i lona alofa tele i lona tamā auā o ia na tigaina i le tausiga o ia. O tupe uma foi na maua e lona tamā sa faaaoga ai o ia i se tasi o aoga i totonu o le nuu.

Ae na faaalia e le teineitiiti, o lona tamā e onā pe inu pia i aso uma. O se tasi o po sa inu ai lana fagupia sa ia faatonuina ai o ia e fofola o la fala ma tatau le tainamu. Na te‘i ane le teineititi i se taimi o le po ina ua ia faalogoina o loo faatino e lona tamā se feusuaiga faamalosi ia te ia.

E faatolu ona faia lea gaioiga amio leaga a lē ua molia i lona afafine ma o taimi lava ia na ta‘ua e le teineititi e inu lava le fagu pia a lona tamā. Sa faailoa foi e le teineititi e iai isi osofaiga faapea a le toeaina ae ua galo ia te ia aso ma taimi e faia ai. I le molimau a le tamaloa na ia matuā teena ai le faamatalaga a lona afafine. Na faaalia e le tamā, o lona afafine ua leva ona fia alu ese ma ia, o le mafuaaga lea ua ia faia ai ia faamatalaga pepelo ma lē sa‘o.

Na ta‘ua foi e lē ua molia o lona afafine na ave e leoleo e suesue i se mataupu na tuuaia ai ni tama talavou, ae na avatu ai ma ia. Na faato‘ā ia iloa tuuaiga a lona afafine ina ua taunuu i le ofisa o leoleo i Tuasivi ma faailoa atu ai le faamatalaga a le teineititi. O le mau a le tamaloa o ni tuuaiga lē sa‘o ma le soonafai faasaga ia te ia. Sa ia ta‘ua foi o le tele o taimi i le tuputupu a‘e o lona afafine seia oo ina 14 tausaga sa tausi lava e ona mātua ua maliliu faapea ona tuafāfine.

E leai foi se taimi e moe ai le teineititi ia te ia, auā e moe i uta i lana faatoaga. Fai mai lana molimau ua na o taimi o le ao e oo i le afiafi ae lei po la te mafuta ai ma lona afafine.

Peitai i le mae‘a o iloiloga a le laulau o faatonu e toalua tamaitai ma alii e toalua na taunuu ai i latou i se faaiuga e faamaonia uma moliaga e tolu o le faiaiga faamalosi poo le rape.

O loo faatalia nei se faaiuga a le faamasinoga i le mataupu ma e atagia mai i lenei faamasinoga e soloatoa i le falepuipui se faasalaga e pei ona faailoa e le alii faamasino o Justice Slicer a o lei tolopo le mataupu.