O le tiute tauave o tina i totonu o aiga ma nuu aemaise o ekalesia ua tatou molimauina le tāua tele ona ua maua ai e fanau ma le lautele o tagata o le aiga se isi fesoasoani mai o latou tomai alofilima i taleni ma tomai ua latou maua.
O se tasi lava o faiva alofilima o tina ma tamaitai o le su‘isu‘i auā o se isi lea o vaega e manaomia tele i totonu o aiga. O le tāua foi o lea faaiva alofilima ona ua mafai ona faasaoina ai seleni e alu i le faatau o lavalava auā a aoaoina lelei tina ma tamaitai i le su‘isu‘i o le a lē gata e aogā mo lona aiga ae mafai foi ona saili seleni ai i le su‘iina o laei o isi tagata.
O le ekalesia a le afioaga o Samusu, o le Samusu Elim Congregation ua taulimaina e le mafutaga a tina se foai tāua mai le ofisa o le Hai Komesina o Ausetalia i Samoa, o laau su‘isu‘i fou o le ituaiga o le Singer o le a aoaoina ai le su‘isu‘i a tina o le mafutaga ma aoaoina a foi ma alo tamaitai o le ekalesia ia silafia ma iloa le faatinoina o lea tomai tāua.
E silia i le sefulu afe le tau o le foai mai le fesoasoani tuusa‘o a le ofisa o Ausetalia mo atinae laiti a nuu ma ekalesia ma faalapotopotoga tuma‘oti i Samoa. Faaalia e le faafeagaiga o le Samusu Elim Congregation o le foai lenei ua silasila ai tina o le ekalesia i se isi alamanuia mo o latou aiga.
O le molimau foi lea a se tasi o faiaoga o le su‘isu‘i le susuga Kiona Lemoa ona o lona finagalo na ia faaalia ai, o se tomai tāua tele le silafia su‘isu‘i auā o tina e iai lea tomai o le a mafai ona latou faasoa atu i isi tina ma tamaitai.
O le mafutaga a tina o le ekalesia o le Tina Manumalo, o le a latou faaaogāina laau su‘isu‘i lea e sefulu laau e alu i le eletise ae lima laau e vili lima. Faaalia e le sui o le ofisa o Ausetalia i Apia le faletua le tofa Ulugia Ana Hall, o le autu foi lea o le fesoasoani ia mafai ona auala atu ai se galuega alofa mo isi tagata o le atunuu o loo fia maua ni tomai e aogā ma tāua i le atinaeina o aiga, ma siitia ai i se tulaga lelei o latou soifuaga o aso uma.
O le naunautaiga o le sui o le ofisa o Ausetalia i Samoa ia mafai foi e isi faalapotopotoga o tagata lautele ona faaosofia lagona e faatino ni taumafaiga tau atinae mo le siitia foi o o latou olaga ma maua ai se fesoasoani moi latou.
O le vaiaso nei e amata ai le aoaoina o le su‘isu‘i mo tina o le ekalesia a Samusu mo le lua vaiaso, ma e mae‘a le aoga ua maua e tina le silafia e su‘i soo se ituaiga o laei faapea isi galuega tau tina e pei o ieafu, ie ufi moega, ufi laulau ma isi.
O le faamoemoe ia mae‘a le ono masina ua faalauiloa e tina a latou galuega su‘isu‘i e pine ai le atinae ua latou faatino.
