Faamanuiaina le Fono a Sini i le $110,000 mo polokalame atina‘e

O le tulai mai o le Laulau Fou a le Fono Aoao a Tagata Samoa i Sini ua seei mai ai ma se faamanuiaga tele mo le lua tusaga mai le Malo o Ausetalia e tusa ma le $110.000 lea ua fuafuaina e faataunuu ai ana polokalame mo le atina‘e o tupulaga ma aiga o loo fia maua se faasinoala mo fesoasoani a le malo e pei o aoaoga fua ma tautua i sailiga o fale ma aiga faatoa taunuu mai i Ausetalia.
O le isi polokalame o loo fuafua i ai le Fono o le faafitauli o le tuufau o fanau ma see atu ai i kegi ma vaega faatupu vevesi i kalapu ma nofoaga faitele. O le galulue faatasi ma nisi o faalapotopotoga o loo leoleoina pitonuu o toatele ai o tatou tagata ma fanau o loo tataa solo.
E lua tausaga ua auina mai ai lea tinoitupe mo galuega fai a le Fono ua silia ma le lima tausaga o taumafai atu mo se fesoasoani talu mai faletonu na iai i taimi ua tea. O upu a le atunuu “O le fuata lava ma lona lou”. O le susuga i le Taitaifono le loia ia Teleiai Sonny Wilson ma le Public Officer ia Leilua Jerry Uesele na sainia aloaia lea feagaiga ma faamatuu mai ai le siaki mo tapenaga mo le lua tausaga.
O nisi o polokalame o lenei tausaga e aofia ai le galulue faatasi ma le Lau Samoa i le tuufaatasia o le Tutoatasi i le masina talu ai, faapea le valaaulia o sui a Faipule na malaga mai mo le Siva o le tutoatasi le Afioga Tusa Misi Tupuola faapea Toeolesulusulu Cedric Schuster.
O polokalame ua faataatitia e aofia ai le Seminar mo tupulaga o loo tau mafuli atu i taaga ma faafitauli lea o le a faafoeina e le susuga ia Nifae Sita.
O le isi Poloketi o le faaaogāina o le aganuu ma taaloga e luitau ma faatonutonu ai tupulaga e ono aafia i faalavelave e tatai i ai e a latou uo ma paaga lea e faafoeina e Leilua Jerry Uesele.
O le afioga ia Muagututia Vailolo Siutu ma le tina ia Seiuli Kamila Toleafoa o loo nafa ma tuaa sinasina.
O se itu tāua ua alo atu i ai le Laulau fou o le Fono o le faamaumauina lelei lea o sini ma autū uma o nei galuega mo tagata Samoa i Sini aemaise le faamaumauina lelei o tupe alu ma le faaaogāina i nei atinae ia tumau ai pea le galuega lelei ua tini ai nei le faamoemoe.