O aso fiafia nei mo mātua aemaise aiga, a o faaeaina nisi o alo ma fanau i o latou faailoga sa aotauina ai mo le tele o tausaga i aoaoga maualuluga e pei o Iunivesite.
E maligi loifofoga ona o le loto ua tumu i le olioli ma le faafetai a‘e i le Atua, auā sa momoli i talosaga i le ao ma le po ma tuu atu i le Atua i lana tausiga nei alo ma fanau, aemaise ia foai le mafaufau matala ia i latou a o feagai ma suesuega i le poto aoaoina, ae o lenei ua tali faaaliali mai ina ua faaiuina manuia a latou taumafaiga, ma faaeaina i ni faailoga e pei ona sa tausinio i ai.
O le aso 30 o Setema 2014, i le Aotea Square i Aukilani na faataunuu ai le faauuga a le Auckland University, i le tele o faailoga eseese mo alo ma fanau sa aoaoina ai. E tele fanau aoga mai atunuu eseese sa faauuina, ae na filo ai lava foi ma nisi o alo o Samoa na faauu ai.
Sa aofia ai i nei alo o Samoa, le tamaitai o Mesepa Niva Esther Risale, Christina Koonwaiyou ma Xavior Afoa. O i latou uma e toatolu na faauu mai ma o latou faailoga Bachelor of Arts mai le Iunivesite lea o Aukilani i le aso 30 o Setema.
E molimoli atu ai faamanuiaga a outou mātua, uso ma tuagane, faapea aiga uma sa nofo taputapuai ai atu a o tou sagai i le sailia o le poto. Tau ina ia faamanuia pea le Atua i o outou ala uma ma ni fuafuaga ua tou sauni atu i ai mo le lumanai auā se manuia o aiga, nuu ma le atunuu. Tau lava ina tou manatua, ia avea pea le Atua ma taiala i o outou ala uma.
