“O lē lava e tele lana e lūlū, e tele foi lana e selesele mai”. O le soifuaga lenei o le tele o avanoa o loo tatala mai mo le faalauteleina o le malamalama i soo se tomai, ma le mau faitotoa o faamanuiaga.
Ae o le liutau mo le tagata soifua, ia iai sona naunautaiga e tatala ma ulufale atu i na faitotoa o avanoa matagofie, auā o tua atu o toatuga ma faigata, o loo faatali mai ai manuia ma faamanuiaga, e faaulaina le tagata lototele ma le lē fiugofie.
O fiafiaga ma mitamitaga na sa tofo suamalie i ai tamaitai lalelei o Brenda Neri-Schaaf ma Valita Partsch, ina ua faaiuina manuia le tausaga atoa o a‘oa‘oga sa feagai ma i laua, auā le toe sailia o le tusipasi, o le Community Health Level 4, e pei ona sa faatautaia i le MIT. O le Aso Faraile, aso 20 o Me 2011 na faia ai le faauuga o nei tamaitai, ma sa auai atu foi i ai aiga ma uo e faaula ma molimauina le tauaaoina aloaia o tusipasi e pei ona sa a‘otauina ai i laua.
O i laua uma o loo galulue o ni Community Health Coordinators i vaega o le Soifua maloloina i Aukilani i Saute ma Sisifo. Ae o le toe faaopoopoo atu o nei tomai e pei ona iai tusipasi ua la tauaaoina, o lona uiga o se isi foi lea avanoa e toe laalaa atili ai pea i luma le faatinoga o a la galuega, i nisi foi tulaga tāua i totonu lava o le Matagaluega o loo la tautua ai.
E momoli atu ai faamanuiaga a o oulua aiga uma, uo ma paaga, faapea foi le nusipepa a le Samoa Times mo lo oulua faauuga, Brenda & Valita. Malo finafinau! Ua faia lava e oulua mea silisili!
