O le aso 9 o Fepuari i le tausaga e 1942 sa soifua a‘e ai le tina matua i lona alalafaga o Lepā i Samoa. Mo le silafia o le tina matua ia Gaseolela‘ipoufā o le tuafafine lea o le afioga i le Alii Palemia o Samoa, Tuilaepa Neioti Fatialofa Sailele Malielegaoi.
Sa taitaia le sauniga lotu e le susuga ia Bishop Willie Ing o le Ekalesia a Iesu Keriso o le Au Paia o Aso e Gata Ai i le Uarota a Bell Bird Park.
Na matuai faatumulia i le Uarota ma le Au Paia e lē gata i lea o aiga ma uo a le tina matua. Sa mafai foi ona molimauina lea aso fiafia e le Afioga ia Tauiliili Peseta Ata ma le faletua ia Elisapeta Malifa (Faatonu o le alaleo 4EB i Brisbane) faapea le sui Convenor le afioga ia Tauiliili Itaotemai Sugi Pepe Patū ma le faletua faapea nisi o tupu ma tamalii o le atunuu.
Sa fai ma fofoga o le aso le susuga ia Veni Malielegaoi Siliva na malaga mai le aai o Niu Sa Uelese. Na faamalieina le auvalaaulia i le matagofie o aitema a alo ma fanau ae sili ai le to‘a lelei o le laualo i le felanulanuai o le taumafataga na tapenaina e le Fiafia Catering.
O le tofa ia Semu‘a Faigaumu sa fai ma sui o aiga e tali fuaitau ma momoli foi se matū palapala auā le auvalaaulia.
O le susuga ia Matafeo Faitala Lualua sa fai ma sui o le auvalaaulia e faafetaia le tina ia Gase ma le paia i aiga ona o le tele o faalumaga tāua na tofusia ai le gogo ma si ana i‘a.
Manuia tele le laasia ai e oe le tina matua o le 70 o tausaga o lou soifua. Alofaaga e lē mavae mai le nofoaalo faapea ou aiga ma uo pele i Samoa, Ausetalia ma Niu Sila, alolofa atu foi alaleo e lua i Brisbane mo oe le Tina Gase (4EB & Penina o Asuisui).
