“O le aso lenei ua faia e Ieova tatou te fiafia ma olioli i ai..ana le seanoa o Ia, semanu tatou te le maua lenei aso faapitoa ua faamanatuina ai nei tausaga e tele ua Ia agalelei ai mo oe Joseph”.
O lagona o le olioli ma le alaga o le faaneetaga na momoliina ai le taulaga o le faafetai, ina ua potopoto aiga ma uo a le alii o Joseph Ulia, o le alo o le susuga i le faafeagaiga ia Pastor Fitiafiafi Ulia ma le faletua ia Moritani Ulia mai le ekalesia, Holy Word Worship Centre, i Otara, i le faaiuga o le vaiaso na se‘i mavae atu nei.
Na faatinoina lenei faamoemoe i le faleaiga o le Happy Days i Manukau. Mataina lenei faamoemoe ona e le gata sa matuā faatumulia i uo ma aiga, ae na faapea foi ona auai ma nisi o le aufaigaluega sa faapea ona mafuta faatasi ai i lea afiafi , aemaise le susuga i le faafeagaiga lagolago o le ekalesia, le susuga Associate- Pastor Laki Laufale, sa taitaia le tatalo faamanuia mo le alii o Joseph.
Sasala manaia foi kuka ma felanulanuai le matagofie o le taumafataga na gaseseina lava e le faleaiga a le Happy Days, aemaise o tapenaga sa faatino e le susuga i le faafeagaiga faapea lona faletua, aemaise o le aiga, mo le aso faapitoa o lo laua alo.
Momoli atu faamanuiaga e tele ma moomoooga alofa ina ia faapea ona agalelei le Atua i ou laasaga uma mo le lumanai Joseph. Foai e le Atua nisi aso se tele o lou olaga e pei o lā a le faisalamo i le Salamo 37: ‘Fiafia lava oe i le Atua, ona foaiina mai lea e Ia mea e manao i ai lou loto’.
Alofaaga e lē mavae mai nai ou mātua, uo ma aiga i Niu Sila, Ausetalia ma Samoa, faapea lau ekalesia, Autalavou & Worship Team – Worship Centre, Otara.
