O la le Tusi Paia: “Ia e ava i lou tama ma lou tina ina ia faalevaleva ai ou aso i le nuu ua foaina atu e le Atua ia te oe.” E iai le talitonuga o lenei tina ua atoa lona 100 tausaga, o se tina sa usitai ma ava i ona tuaa.
I le matagofie o le susulu o le la ma le toafilemu o le aoauli o le Aso Faraile na tea nei 29/8/2014 na ulufale ai le mamalu o le auvalaaulia faapea le Aufaigaluega Paia a le Atua, uo ma ē masani mai soo se itu o Niu Sila, Samoa aemaise o totonu lava o le laumua, i le maota o le EFKS i Cannons Creek i Porirua mo le faamanatuina o le 100 tausaga o le tina ia Avea‘i Fui Lualua.
E lē lau aulia e tagata ola uma o le lalolagi nei ia nei tausaga e 100, ae o se mitamitaga o le nofoaalo ma aiga uma e ao ona faafoi le viiga o le Atua, ona o le soifua tulu‘i o si o latou tina e ala i le faailogaina faapitoa o lona aso soifua, e pei ona masani ai le tele o tagata.
O le sauniga lotu na taitaia lea e le susuga i le Toeaina malolo manumalo ia Popo Su‘a, o lē sa faafeagai ma le tapueina o le soifua faakerisiano o Avea‘i i tausaga e tele i totonu o Niu Sila nei.
Na saunoa foi le susuga ia Popo Su‘a e matuā malosi tele le faatuatua o lenei tina ma e tautua faamaoni i lona tofi tiakono na auauna i le Atua i le ekalesia i Ketesemane. Na toe malaga mai lava le susuga i le Toeaina Malolo Manumalo ia Su‘a ma le faletua ia Epenesa mai Samoa ona o le finagalo o le tina ia Avea‘i ina ia taitaia e lana faifeau lona lotu o lona aso soifua.
Na mae‘a le sauniga lotu ona sosoo lea ma le saunoaga a se tasi o alo o le tina le afioga ia Fui Pii II. Sa saunia le tala otooto o le soifua mai o le tina ia Avea‘i mai totonu o Savaia Lefaga seia oo mai lava i Niu Sila nei.
Sa soifua mai Avea‘i i le aso 26 o Aokuso 1914 i Savaia Lefaga, ma na atoa lona 100 tausaga ma aso e tolu i le Aso Faraile na tea nei. Na soifua mai lenei tina a o feagai ai Samoa ma le pulega a Siamani.
Na faaipoipo atu ia Tolua Lualua Asiata mai Satupaitea i le 1935 ma e toaiva o la alo. E tusa e ova ma le 300 le aofai o tagata na tutupu mai ai i lenei tina e pei ona ta‘ua e Matuaifalemua Tolua Lualua i le tusitala.
E toalua alo o le tina ia Avea‘i o loo galulue i le galuega a le Atua. E ono tupulaga a lenei tina ma o se tulaga ese lea i faamanuiaga a le Atua i lana foai e ala i le faatupulaia o le nofoaalo. O ona mātua o Fui Pii I mai Savaia Lefaga ma Aofia mai Gataivai.
O le 1970 na malaga mai ai i Niu Sila ma toe foi i Samoa. Na toe malaga mai i Niu Sila i le 1974 ma nofo mau ai loa ma nai ona alo.
O le molimau suesueina e le afioga ia Fui Pii II e faapea, o le tagata muamua lenei o Savaia ua ausia le 100 tausaga o le soifua. Viia pea le Atua! Sa auauna i le EFKS i Waihemo ma i le 1980 na toe sifi atu ai i le EFKS i Ketesemane ma o le molimau na ta‘ua o se tina naunau i le lotu ma tausi faafeagaiga ma le tautuaina faamaoni o lona tofi tiakono.
I le mae‘a ai o le tala o le soifua o le tina ona sosoo loa lea ma le lauina o faamanuiaga mai le Tupu Tamaitai o Elisapeta II, faapea le Palemia Hon John Key. Amuia foi lenei tina ua afea i faamanuiaga mai le Tupu o Peretania faapea le Palemia o Niu Sila.
Sa tuu atu le avanoa i se saunoaga a le tina ia Avea‘i, ma e ofo ai le toatele o le auvalaaulia i le matala pea o le mafaufau o le tina e tusa o lana saunoaga faafetai i le susuga i le Toeaina ia Popo Su‘a faapea lana faafetai i le auvalaaulia ma lana fanau.
Sa pati ma tutulai le auvalaaulia ina ua mae‘a le saunoaga a Avea‘i o le foliga o le fiafia fai a‘e e tusa o le manino o le finagalo o le tina i nei tausaga e tele o lona soifua matua. Na faasolo atu le polokalame i le taumafataga matagofie felanulanuai na tali ai le sua a le Aufaigaluega Paia ma le mamalu o le auvalaaulia.
E lei faatamala foi le fanau e toatele i le tapenaga o faafiafiaga matagofie sa faafiafia ai lo latou tina matua aemaise le auvalaaulia i lona aso. O le afioga ia Fui Kitiona Fagaale na saunoa e momoli le faamalo i le Taitai o le sauniga ma le aufaigaluega i faafeagaiga uma faapea le auvalaaulia na auai faapea foi ma le feagai ai ma faaaloaloga masani i tulaga o mea faapenei.
Na tulai le susuga i le failautusi o le ekalesia Ketesemane le Tofa ia Fiso Moa e laga faatau ma e talu ai ona sa tootoo alii le aso o lea na ia tuuina atu ai i le afioga ia Tauiliili Tumua Uluilelata mo se saunoaga faafetai i le aiga mo le taumafataga tele faapea i faaaloaloga maualuluga na tauaao i ai. E lei masepu pe sasi le faatinoga o le polokalame atoa o le aso i le faatautaiga a le Fetalaiga ia Matuaifalemua Poamo Lualua na fai ma Fofoga o le aso.
Avea foi lenei avanoa e momoli tele atu ai faamanuiaga a le tatou nusipepa i le tina ia Avea‘i Fui Lualua mo lou aso soifua. Ia saga tulu‘i pea aso o lou soifua mai le Atua e saga auauna atu ai pea mo ia i lenei olaga lē tumau.
