Soo se faiva lava e tapua’ia, o faiva ia e a’e mai ma le manuia. O se vaaiga fiafia lea i le Aso Toonai 23 Aukuso, i le molimauina e aiga faapea uo ma ē masani le samaga tatau, ina ua faaiuina ma le manuia galuega o le lagimalofie e pei ona feagai ai i aso e sefulu ma le lua.
O le taulaga faafetai i le Atua sa taitaia lea e le susuga i le a‘oa‘o ia Lolo Mata‘u mai le ekalesia EFKS. O le faletua ia Satelite Tautiepa o le faletua o
le susuga ia Rec Lance sa lagolagosua i le faamomoe.
Na ta‘ua e le susuga ia Fauea Terry Fauea sa auai, ina ua mae‘a saunoaga faamanuia a Su‘a i le ‘au taooto, ona tatala loa lea o sā o le galuega, ae saasaa ma le fiafia le au sogaimiti ma manaia e toalua sa patino i ai le faamoemoe faapea le autamaitai sa tāina malu. O i latou sa taliau mo le sefulu aso e toafā sogaimti, o Faleao Ionatana Gray, Vaima‘a Faletagoa‘i, Masoe Moli Ah Ching ma Sione Tufuga. O manaia e toalua o Momoemaleaitumalietoalelua Gray Faletagoa‘i ma Tiresa Gray.
O le matuaofaiva sa nafa ma le galuega, o le susuga ia Su‘a Popo Leaufono Peko Su‘a Pala. Na saunoa le susuga ia Su‘a o sana uluai galuega lea i totonu o Kuiniselani nei.
O le tamā matua o le aiga le fetalaiga ia Leuga Talafou Gasu Gray sa feagai ma le aso, aemaise foi faaaloaloga e masani ai le atunuu i aso faapenei, ae o le tofa ia Tapuala Agiga Su‘a Pala sa tu tootoo auā le tufuga ma le aufaigaluega sa feagai ma le galuega fita.
