O le faaiuga o le vaiaso na tuua ai le atunuu e tamaitai ua filifilia nei e galulue o Leoleo mo le Tausiga o le Filemu i Timor i Sasa‘e. O le uluai vaega lenei o Leoleo ua agai atu i se galuega faapenei ae ua na o tamaitai. O se filifiliga na ta‘ua e le afioga i le Komesina o Leoleo ina ua faato‘ā talosagaina lenei aumalaga.
E tāua tele i le siitia ai o le galuega faaleoleo aemaise o le maua ai e tamaitai leoleo o Samoa o le avanoa e galulue faavaomalo ai. E lē o le taimi muamua lenei ua agai atu ai i atunuu mamao tamaitai leoleo o Samoa mo se faamoemoe poo galuega faapenei, ae o le taimi muamua lenei ua agai ai lava na o tamaitai.
O le taitai leoleo le tamaitai o Faagoto Patu Ioane, o se alo faasino i le sa avea ma Sui o le Fono o Sui Tofia i tausaga ua mavae, le afioga Mataafa Patu – o ia foi o le faletua o le afioga i le Faipule o Faasaleleaga Numera 4, le Afioga Vui Tupe Ioane, o loo taitaia lenei aumalaga o tamaitai leoleo.
A o lei tuua la le atunuu mo Timor i Sasa‘e, sa feiloai atu nei tamaitai i le taitai o le Malo auā se upu faamalosi i le feagai ai ma tiute o le tausiga o le filemu i lea atunuu. O tamaitai sa talosaga mo ni avanoa e galulue ai mo le tausiga o le filemu i Dafur i Aferika. E toatasi se isi tamaitai leoleo mai i Samoa sa galue ai ma ua toe foi mai.
Sa ta‘ua le matautia o le tulaga o iai vevesi i le va lava ia o leoleo ma tagata faatuiese o loo faia pea osofaiga i Darfur ma na ta‘ua e le alii Komesina o Leoleo, o le faatonuga lava mai i le puipuiga o Malo Aufaatasi na faamamafa mai ai ua toe faafoi uma tamaitai leoleo na galulue i galuega faaleoleo ma le puipuiga i o latou atunuu ona o le popolega i le taulai ai o osofaiga faasaga i tamaitai o loo galulue ai i lea atunuu.
O tamaitai la nei sa toe avatu o latou suafa i isi atunuu o loo tautua ai leoleo faavaomalo e pei ona ua aofia ai nei Samoa, i lalo o le vaavaaiga a Malo Aufaatasi.
“O tamaitai foi nei sa filifilia mai lava i le mae‘a ai o faataitaiga ma suega aemaise o sailiiliga a le Matagaluega ma ua faamautu ai e fiu e mafai e tamaitai ona faatino nei galuega o le tausiga o le filemu pe a malaga atu i fafo,” o se faamatalaga lea a le Komesina o Leoleo.
“Sa tuu lava i le faaiuga a Malo Aufaatasi le avatu o nei tamaitai i Darfur a o lea ua talia mai le agai loa i Timor i Sasa‘e lea lava e lē o mautu ai se filemu i le taimi nei”. O le toafā la ua filifilia, o le tausaga atoa lea o le a galulue ai i Timor i Sasa‘e ma o sauniuniga uma o le ola galue faaleoleo na ta‘ua e nei tamaitai o le a iloilo nei i le auai atu ai i galuega ua faatali mai i lea atunuu.
