O le mitamitaga i loto o tupulaga talavou o le EFKS i Manurewa ma Grey Lynn ona ua maua se avanoa e faasoa mai ai le susuga i le malu o le malo ia Savea Martin Auvaa e uiga i tulafono o le Sauaina o Aiga.
O se agaga faagaeetia foi i lea tamalii o le atunuu i lona faasoa o ia vaega i tupulaga talavou auā lo latou nofo malamalama e uiga i tulafono o lenei atunuu, auā fai mai le upu, e ese lou iloa ese lou malamalama i tulafono ma auala e faagaioi ai.
O le aoauli o le Aso Sa ua mavae na faatino ai lenei polokalame i le hall a le Ekalesia EFKS i Grey Lynn, i le faamalamalamaina o tulafono o le Sauaina o Aiga. O lenei faamoemoe sa faapitoa lava i tupulaga talavou, ma o le soo a nei autalavou e masani ai, ae ua maua ai ma le avanoa a le malu o le malo e tufa ma faasoa i mea lelei auā le nofo manino ma le malamalama o talavou.
Sa taitai le polokalame e le susuga i le faafeagaiga ia Peniamina Leota i le tatalo ma saunoa ai loa le Afioga Aumua Too Vaega e faafeiloai i fanau talavou. Na telē se avanoa na tatala ai le faasoa a lea tamalii mo tupulaga talavou, aemaise o le mata alia i taimi uma e kiliva ai le mau ina ia ofi gofie i loto ma agaga o le fanau, ae lē gata i lea o nisi o lana faasoa sa faaautu lea i le Tusi Paia, ma sa momoli faatasi ai le tulafono a le malo faatasi ai ma tulafono o loo auina mai i le Afioga a le Atua.
Ma sa tuu avanoa foi le afioga ia Savea Martin i fanau pe iai nisi vaega e fia malamalama ai, ae ina ua manino i le faalogo a tupulaga talavou, sa maua ai ma le avanoa e tatala ai fesili ona o le fia manaomia lava o le sosia ma faamanuiaga o loo sasaa mai e le leoleo.
O se vaaiga fiafia foi i tupulaga i lea afiafi ona o se avanoa lē aumaua mo i latou. Auā ua faalua ai lea ona faasoa le afioga ia Savea Martin i lea Ekalesia ae sa faatasi ai ma mātua i le faatasiga muamua.
Peitai o le naunautaiga lava i tutpulaga talavou ia maua se avanoa na o latou e pei ona faataunuuina ai i le Aso Sa.
Na saunoa foi le susuga i le faafeagaiga ia Rev Peniamina Leota i le polokalame muamua, sa lagona le fiafia o tagata matutua auā o lea ua manino ma malamalama foi latou i tulafono ma vaega uma e pei ona aumau ai i lenei atunuu, aemaise lava i le va o mātua ma fanau, o le tāua foi i le galuega faafaifeau, ia iloa ona faasoa tamaiti, auā e iai taimi e fiu e faatalanoa tamaiti ae lē mafai ona tali, ae ua avea lenei polokalame ua mafai ai ona faasoa ma talanoa talavou i ni vaega o loo talanoa i ai le faifeau. Ma o se avanoa lelei tele ua maua e le susuga i le faafeagaiga ia Talia Tapaleao ma lana autalavou faapea foi le autalavou a Grey Lynn.
O lenei polokalame ua faaigoaina o le Healthy Village Action Zone (HVAZ), ma o loo faatinoina lea e le kamupani o le Alliance Health Plus o loo galulue ai nisi o tamalii o le atunuu le Afioga Aumua Too Vaega, ma o loo soosootau‘au nei ma le tautua a le afioga ia Savea Martin Auvaa o loo galue i le ofisa o leoleo i Avondale.
O le tāua ia maua le faamalositino, lelei taumafataga ma maua le soifua maloloina e o tatou tagata, ma ia iloa ma malamalama i tulafono o atunuu o loo aumau ai.
