“Na e tausia a‘u i ou aao mai lo‘u itiiti ma lo‘u olaga atoa,” o upu a le faisalamo na fai ma manatu autu o afioga faauuina na tomatauina ai le mamalu na aofia potopoto, mai lava i mauga tetele se tafā mauga e oo lava i mauga tamatama.
O le susuga i le faafeagaiga taulagi ia Pastor Apouani Tapuala Unasa na taitaia le sauniga lotu o le Iupeli siliva o le A‘oa‘o Failauga ia Ape, na galulue sootauau ma faafeagaiga ia Tavita Anetipa ma Solomona Vaofusi. O le susuga lava foi ia Apouani na fofogaina le molimau mo si ona uso le tofa ia Ape Namulauulu Unasa.
Na mae‘a le sauniga paia ma le molimau ona alo lea i le taliina o le sua ma le taumafataga tele ma le felanulanuai na ma‘au i ai aiga na lua aemaise o le malu mo faamoemoe tetele faapenei (reception) le Heritage i le pitonuu o Epping, ma faasolo ai ma faafiafiaga matagofie a alo ma fanau a le aiga, aemaise o pesepesega mālie a le Unasa Brothers na palepalea le taliina o le sua.
O le aso ua ula ma maualuga ona na oo faatinoga a aiga na lua i faaaloaloga faatupu mo le Aufaigaluega Paia aemaise o Tapaau ma Tupu o le atunuu faapea sui maualuluga o nisi o matagaluega sa auai.
O le fetalaiga ia Namulauulu Sofeni na malaga mai Samoa na tu tootoo mo le aso, a o le tofa ia Tuu‘u Leato Tupuola na fai ma sui o le valaaulia ma Samoa. Na ta‘ape ma le mama ua lomi le atunuu i faaaloaloga ua tauaaoina, ina ua mae‘a a latou faamanuiaga i le soifua o le tofa ia Ape.
Alofaaga mai si au manamea ia Masina ma nai ou alo o Jerry ma Renee, Amanda ma Albert, Jerome, Jonathan, Jordan, Nashley ma Fia, ma nai au grandchildren ia Exayvion, Elshalom ma Janeiro, faapea le faafeagaiga ia Apouani ma Olevia Unasa, Namulauulu Unasa, lau Ekalesia aemaise ou aiga uma i Samoa, Niu Sila ma Ausetalia. Momoli atu foi alofaaga o le ofisa o le Samoa Times i Melepone mo lau tofa Ape. Manuia lou Aso Soifua!
