O lagona mafanafana ma le olioli o le agaga, na lagonaina e alo ma fanau a le tina matua, le tuaa sinasina ia Tu‘uaiga Pese Siaopo Ropati, aemaise o tauaiga sa potopoto faatasi mo le faamanatuina o le 91 tausaga ua aulia e le tina. Na soifua ane le tina i lona afioaga o Satitoa, Aleipata i le aso 18 Iuni 1924.
O le faaiuga o le vaiaso na tea nei, sa faamanatuina ai i le pitonuu o Taita i Ueligitone, le sauniga aemaise foi o le taumafataga felanulanuai, faapea se mafutaga faapitoa a alo ma fanau a le tina ia Tu‘uaiga, e faamanatuina ai le 91 tausaga o lona soifua.
E felanulanuai le matagofie o faamanuiaga a le Atua i le talaaga o le soifua o le tina, a o logo faatutuila le auvalaaulia sa potopoto i lea aso i le faasoa mai o alofaaga molimoli, o meaalofa aemaise o le tatalo ma le alaga o le faafetai, ona o le soifua auauna o le tina.
O Tu‘uaiga e ulumatua i ona uso ma tuagane, ma e toasefulutasi le aofaiga atoa o i latou. Na valaau le Atua i le tamā o le aiga le susuga ia Pese Siaopo Ropati Tua‘ilemafua i le tausaga e 1977, a o aumau ai lava i latou i Ueligitone.
O le tuaa sinasina foi ia Tu‘uaiga o se fiafiaga tele ia te ia le tomanatu ma faamatalatala i nai ona alo, lona soifua tuputupu a‘e i Samoa aemaise le vaitaimi faagalogata e ui o se vaitaimi sa tele le mata‘u i nisi o nai o tatou tagata, ona o pulega faa-Siamani sa puleaina Samoa i lea vaitaimi.
E to‘a sefulutasi alo o le tina ia Tu‘uaiga, e 31 le aofaiga o fanau a ona alo aemaise le 49 o fanauiti (great grandchildren). O loo iai foi nisi o nai ona alo o loo galulue i le galuega a le Atua ma o se tina e taulai lona soifua i le tatalo e le mavae, ma o ia o se mitamitaga i ona aiga ona o lona loto osiaiga, alofa ma le loto maulalo.
O loo momoli tele atu alofaaga o ou aiga uma aemaise ia agalelei pea le Atua ma saga foai atu le soifua laulelei ia te oe le tina.
From all your children, grandchildren and great grandchildren, We pray that our God will continue to bless you Mum with more years to come and good health. We love you Mum!
