O se mea matagofie le mafuta ma fiafia faatasi o aiga, o uo ma aumea mamae auā sa tele ma loaloa aso o valavala ona o le vaoeseese o nofoaga ma alalafaga.
Peitai o le faamanatuina o le aso soifua o le faletua, le tausala, o le tina, o se uo ma o se tagata ua tele sona sao ma sona aogā i le lautele o tagata eseese, o le ala lea na mafai ai ona maua se mafutaga manaia ma le matagofie i le maota o le Dream Centre i Manukau i le afiafi o le Aso Toonai na mavae atu nei, a o faamanatuina ai le tāua tele o le aulia mai o le 65 tausaga o le afioga ia Sofia Stowers.
O nai ona aiga mai vaega eseese o Aotearoa ma nisi atunuu aemaise le faaalia o lona agaga fiafia ona ua toe feiloai ma fevaaiai ai mo nisi o ana aumea mamae ma uo vavalalata ona o le faamanatuina o lona aso soifua.
Sofia Stowers o faamanuiaga ma moomooga alofa mo oe e lē uma e pei ona fofogaina e le susuga o le fofoga o lea po, le afioga Peseta Leuluaialii Savea Al Harington Lavea, na momoli atu ai ma alofaaga o ou aiga uma lava ia i latou na mafai ona auai mai i le faamanatuina o lou aso soifua, o i latou uma o loo i vaega eseese o le kelope.
O faamanuiaga mai au paaga ma uo, o au aumea mamae ma i latou uma na mafai ona oo atu i ai lou alofa faasalalau ma le lē faatua‘oia. Ia manuia tele lou 65 tausaga Sofia Stowers.
O le saunoaga a le fofoga o le po na ia faapea atu ai, “Ia saga faaaogāina pea e le Atua lou soifua auauna e faaauauina ai pea nisi galuega ma nisi feau lelei se tele o loo faatalitali mai mo oe.” Ia manuia tele lou aso soifua Sofia Stowers!
