Na agai lē malamalama lava le tamā faaleagaga le susuga i le faafeagaiga, Susuga Rev. Savali Fenunuti Ioane ina ua uu lona aao e lana manamea le faletua ia Taito Faaleava F. Ioane ma musumusu atu e faamalosi ane la te savalivali atu i le ICON Champolin Hall o loo fia maua ai se mafutaga ma ia ina ua mae‘a nisi o fuafuaga faaleaulotu sa feagai ai i le Aso Toonai na mavae atu nei.
Na maofa ma faate‘ia le tamā ina oo atu i totonu o le hall ma na maitauina atu ai ni teuga matagofie ae pepese mai loa ma le au valaaulia, o nai ona alo ma ona aiga uma i le pese masani, ia manuia lou aso fanau. Na tu le tamā ua leai se tala ae ua alu pea le faataunuuina o le faamanuia mo ia ma faagasolo ai loa ma le polokamale o le faamanatuina o lona aso soifua ina ua aulia manuia mai le 60 tausaga o lona soifuaga.
O le saunigalotu na momoli ai laau i fogaa ma ave ai le faamua i le Atua e faafetaia ma faamanuina ai lona Suafa Paia, ona o lona alofa faaauau ma le faamaoni i le tamā ia Savali, auā o lea ua aulia mai le 60 tausaga o lona soifua, ae o loo faatupulaia pea lona malosi a ala i lana auaunaga e faatinoina ai lona valaauina, e tusa ma le taitaina o le lafu mamoe a le Atua i totonu o le Ekalesia EFKAS i Otahuhu.
O se sauniga matagofie na taitaiina lava e lona alo ua faauuina mai Kanana-fou le Susuga Ioane Fenunuti Ioane, o ia foi o le Ofisa mo Aoaoga Kerisiano i Ausetalia ma Niu Sila nei. O le tatalo na saunia e le Susuga ia Alosio Mikaele o le faifeau faauu foi mai Kanana-fou o loo galue i totonu o le aulotu EFKAS i Papakura, ma le faitauina o le Tusi Paia na fofogaina e le Susuga i le Aoao Fesoasoani o Lupematasila Tupua‘ilei.
Manaia tele ma matagofie tapenaga a le faletua ia Faaleava ma nai ona alo aemaise o le lagolago malosi a nai aiga uma mo le faatinoina o le faatauaina ma le faamanatuina o le aso soifua o le tamā. Na matua faamalieina foi le mamalu o le au valaaulia i le tele o taumafataga eseese aemaise o faaaloaloga ma faiga meaalofa na faatinoina. E oo lava i faafiafiaga aemaise o le pese matagofie na fatuina lava e alo o le tamā na momoli mai ai o latou alofaaga ma moomooga alofa i si o latou tuaa.
Na faaiuina le faafiafiaga ma le faamoemoe i le saunoaga a Rev. Savali na ia faafetaia ai nai ona alo ma si ona faletua aemaise nai ona aiga uma, auā sa leai lava sona manatu, e lei oo foi sona silafia o tapenaina se faamoemoe pei ona ua faataunuuina. Na matua momoli le loto fiafia ma le agaga faafetai o Savali i le au failotu aua na matuā lelei tapena lea itu o le faamomoe.
Ia o faamanuiaga ma moomooga alofa mo oe tamā faifeau, lau Susuga Savali Fenunuti Ioane. Ia saga faaauau pea le tausiga a le Atua ia te oe ina ia e maua pea le molosi i le tino ma le mafaufau ae faasili le malosi faaleagaga auā le faatauniina pea o lou soifua valaauina i lana galuega. Ia saga faamanuiaina pea foi lou soifua auauna e le Atua ma utupupuina pea le uto i lou loto ma ou manatu auā le tala‘iina o le finagalo o le Atua e ala i lana Tala Lelei.
Ia manuia tele lou aso soifua. Alofaaga mai lou faletua Faaleava F Ioane, o le nofo a alo uma, o aigalotu uma o le mafutaga faaleekalesia, o nai ou tuaa, Fenunuti ma Nive aemaise ou aiga uma lava i Niu Sila nei, Samoa ma soo se vaega o le kelope.
