O se taeao lagilelei ma matagofie na tapena e le Atua, le Aso Toonai aso 16 o Aperila 2016, auā o se aso sa taupoina mo le faamoemoe sa fauao ma faupo, o le Ekalesia EFKS i Kalaiesetete i Niu Sila.
Na matuai faatumulia le lotoā o le Ekalesia i le sauniga amata mo le faamanatuina o le 50 tausaga o le Iupeli Auro o le Ekalesia, talu lona amata mai i totonu o Kalaiesetete.
E na o le lagona fiafia ma le faagaeetia e faafoi ai le viiga i le Atua na lagona i lea taeao ma lea aso atoa, auā o ni tausaga e seasea ona faamanatu i se tautua peitai,o se tasi lea o pine faamau o le mausali o se faamoemoe, lotogatasi, tautua matavela, e ui ina iai le tele o luitau o le soifuaga nei.
Na muai faafeiloai e le Susuga i le Tiakono Toeaina o le Ekalesia ia Molioo Molioo le mamalu o le aofia aemaise o malo faaaloalogia, a o lei amataina le sauniga lotu.
O le tea laitiiti o le 9 i le taeao na amata ai loa le sauniga, sa taitaia e le Susuga i le Faifeau Toeaina Faatonu, Rev. Elder Tumama Vili. O le tatalo amata na saunia e le Susuga ia Rev. Patini Waterhouse, ma le lauga o le sauniga, na fofogaina e le Susuga ia Rev. Fitifiti Luatua.
Na mae‘a le sauniga ona ooti faapitoa ai lea o le lipine o le maa faamanatu o lenei faamoemoe e le Faletua o le Hai-Komesina o Samoa i Niu Sila le Faletua ia Joyce Scanlan, ina ua mae‘a ona faapaiaina e le Susuga i le Toeaina, Rev. Elder Aufaga Faafia.
Na sosoo ai ma le taumafataga tele na faia lava i le hall a le Ekalesia, ma e lei faatamala lava le Susuga i le Toeaina Faatonu Rev. Tumama ma le Faletua ia Elisapeta Vili faapea foi le Ekalesia, i le maualuga o tapenaga i le fofoga taumafa muamua o lea aso.
Na molimauina lenei faamoemoe maualuga ma uigaese e le Afioga i le Hai-Komesina o Samoa i Niu Sila nei, Afioga Leasi Papalii Tommy Scanlan ma le Faletua ia Joyce Scanlan, le Afioga i le Alii Faipule le tofa ia Su‘a William Sio, nisi o Toeaiina malolo faaeaina o le Ekalesia e aofia ai Risatisone ma le Faletua ia Fereni Ete, Susuga ia Ioritana ma le Faletua ia Lonise Tanielu, Susuga ia Senetenari ma le Faletua ia Rossetta Iupeli, aemaise o le Toeaina malolo faaeaina mai Samoa, ia Lale Ieremia, faatasi ai ma nai Tina malolo ia Malo Afamiliona, Fagaloa Stanley ma Tagiilima Muaimalae.
E toatele foi nisi o tamafanau a le Ekalesia sa iai i ona uluai aso i le amata mai, na faimalaga mai i atunuu i fafo ma nisi o vaega o Niu Sila ma Samoa, ae o se tala otooto lenei o le amata mai o le Ekalesia i Kalaiesetete, e oo mai i le taimi nei:
Talaaga
O le Aso Sa, aso 17 o Aperila 1966, o le sauniga lotu lea na tatala aloaia ai le faavaeina o le uluai EFKS i le aai o Kalaiesetete i Niu Sila. O le EFKS muamua foi lea i le motu i Saute, ae o lona 5 i Niu Sila. O le taitai o lea sauniga lotu tāua, o le Susuga ia Siaosi Ieriko, le Faifeau Toeaina mai Aukilani.
O le lauga sa fofogaina lea e le Tamā Faifeau mai Samoa, ia Siataga Tuiataga, o le sui foi lea mai le Ekalesia Aoao.
O loo faamauina i tala tusitusia o le aulotu e faapea, e 5 aiga, ae pe ā ma le 28 tagata na o latou amataina le aulotu i lena Aso Sa. Sa faia lea sauniga amata i le maota sa ta‘ua i na ona po, o le Friendly Hall i Hastings Street, i le pitonuu o Sydenham Kalaiesetete.
O le Afioga i le Alii Tiakono o Tima‘i ma le Afioga ia Mafola Timaloa o sui ia o le EFKS mai Aukilani. Ae o le Afioga i le Tiakono ia Taavao Pulepule Aiono, sa fai ma sui o le aulotu EFKS mai Ueligitone.
O le sauniga foi lea sa faauuina ai Nasau Fuimaono ma le Faletua ia Lima, So‘iso‘i ma Ioimata Manu, faapea Anetone Simanu ma Sina e avea ma Tiakono o le aulotu. Sa faapena foi ona toe aloaia ai le faaaogāina o le tofi Tiakono o le Tofa Feaunati ma le tausi ia Atoalii mai Samoa. O Tiakono ia sa o latou tauaveina le galuega i le amataga.
Faifeau o le Aulotu
(1) Sekone Ioane ma le Faletua ia Avaee
O le Faafeagaiga muamua lea a le EFKS i Kalaiesetete. Na osifeagaiga Sekone ma Avaee ma le aulotu i le masina o Oketopa 1967. O loo ta‘ua e faapea, o taimi aupito faigata lava ia o le galuega a le Atua i le aai. Peitai, sa alofagia e le Atua le Tamā Faifeau ma si ona Faletua.
O Tiakono ma Faletua o loo ta‘ua, o i latou ia e taunuu mai o loo galulue i le Ekalesia. Feaunati ma Atoalii Alesana, So‘iso‘i ma Ioimata Manu, Nasau ma Lima Fuimaono, Anetone ma Sina Simanu, Fareni ma Faoa Tulia, Pulusila ma Salote Sagapolutele, Urima ma Maryan Setu, Agaese Solia ma Levale Peseta.
O le tausaga e 1974 na susū ai Sekone ma Avaee i le la malologa ina ua mae‘a le 8 o tausaga e tusa ma iuga a le Ekalesia. Pagā lea, e lei toe taliu mai le Faifeau ma le Faletua e faaauau le galuega ina ua taliu i Aukilani ma faamautu ai.
(2) Tepa Faletoese ma le Faletua ia May
O le faafeagaiga lona lua lea a le Ekalesia. Na osi feagaiga ma le aulotu i le masina o Setema 1974. O le galulue ai o Tepa ma May i le aulotu, na latou faatauina ai le falesa ma le hall i le tulimanu o Colombo ma Brougham Streets e avea ma meatotino a le EFKS.
Na faapaiaina i le aso 23 o Aperila 1977. Sa faaigoaina le malumalu: “O le Satauro o le Manumalo”, ae faaigoa le hall, “O le Mapusaga.” O loo tauaveina pea ia igoa i le falesa ma le hall ua iai nei. E sili i le 20 tausaga o tapuai ai le Ekalesia i lea nofoaga.
O le Susuga foi ia Tepa ma le Faletua ia May, sa tofia e avea ma Faifeau Toeaina o le Pulega a le Motu i Saute. Peitai ina ua faamalolo i le aso 14 o Me tausaga 1980, e lei toe foi mai le Toeaina ma le Faletua e faaauau le galuega. Na malaga i Ausetalia ma faavae ai le uluai aulotu EFKS i Sini Ausetalia.
(3) Temo Pati ma le Faletua ia Faafeai
O le faafeagaiga lona tolu lea, na osi feagaiga ma le aulotu i le Aso Toonai, 25 o Aperila 1981. Peitai o le Aso Sa, 5 o Fepuari 1984, na lauga faamavae ai Temo i le aulotu ma tuua ai lava le galuega i le afiafi, ina ua mae‘a ona tatala aloaia le feagagiga e le Toeaina o le Pulega ia Sekati Masina i le Aso Toonai ua mavae. Na iai nisi o aiga o le aulotu na o ese atu ma le Faifeau, ae sa nonofo pea le toatele e faaauau le galuega.
(4) Tumama Vili ma le Faletua ia Elisapeta
O le Faifeau lona fā lea na osi feagaiga ma le aulotu i le Aso Toonai, 21 o Tesema 1985, o loo galulue punouai pea e oo mai i le taimi nei, ua savalia nei le 31 o tausaga talu ona osi feagaiga ma le aulotu.
E taunuu mai le Faifeau ma lona Faletua, o loo tulaga lelei mea uma o le Ekalesia. Ua iai fale o le Faifeau faapea le Falesa ma le Hall. E 17 Tiakono, ae pe ā ma le 26 aiga. E lei umi ae toe foi mai nisi o Tiakono.
Sa lelei le autalavou faapea le Aoga Aso Sa. O nei vaega uma, na lagona ai le loto faafetai i le Atua, auā e taunuu mai o loo iai meatotino, aemaise o le aulotu e galulue ai. Ae peitai na maitauina, ua agai ina tuai le falesa ma le hall, aemaise ua lē saogalemu mo tagata.
Ona manatu ai lea e saili se fanua e agai i ai le galuega a le Atua. O le aso 10 o Aokuso 1986, na faatauina ai le fanua lea ua iai nei le Ekalesia, e 8 eka lona tele.
O le tausaga e 1997, na fausia ai le faleaoga o le Aoga Faataitai. O le aso 27 o Iuni 1998, na faataunuu ai le faaulufalega o “Le Satauro Manumalo” e faaauau ai tapuaiga i le Atua soifua.
O le Aso Toonai, 21 o Oketopa i le tausaga e 2000, na umusa ai le Mapusaga Fou hall o le Ekalesia, ae o le aso 26 o Tesema 2008, na umusa ai le matoa o le galuega o loo iai nei.
A tagai malamalama i le talaaga o lenei galuega i lona amata mai i le tausaga 1966 e oo mai i le taimi nei 2016, ona lagona ai lea e le Ekalesia o le fiafia ma le faagaeetia, na mafua ai ona faamanatuina lona 50 tausaga o le iupeli auro e pei ona iai le Aso Toonai 16 ma le Aso Sa 17 o Aperila 2016.
E mautinoa sa iai le anoanoai o faafitauli ma fita o le galuega sa feagai ma le Ekalesia, aemaise i le Aufaigaluega totofi ma o latou Faletua. E ui i lea, o faafitauli e mavae atu, ae tumau ma agai i luma se faamoemoe ua mausali, auā ua moni le fia tautua i le Atua ma lona finagalo.
Na maualuga faaaloaloga i piuga eseese na tali atu ai le Ekalesia ma le Susuga i le Toeaina Faatonu Rev. Tumama ma le Faletua ia Elisapeta Vili i le mamalu o le valaaulia, i le mae‘a ai o se pese na fatu faapitoa ma lagiina e le Ekalesia, e viivii ai lona aso faapitoa i lona 50 tausaga.
O le Aso Sa, 17 o Aperila 2016, o le sauniga lotu aloaia lea o le faamoemoe, na taitaia e le Susuga i le Toeaina Faatonu, Rev. Elder Tumama Vili. O le faitauina o le Tusi Paia, o le Susuga ia Rev. Elder Faatulituli Setu.
O le tatalo o le sauniga o le Susuga i le Sea Faasinoti Niu Sila i Saute o le Ekalesia Metotisi, ma le lauga o le sauniga, na fofogaina lava e le susuga i le Toeaina Faatonu, Rev. Elder Tumama Vili. Na faaiu i le taumafataga tele na saunia foi e le Ekalesia, ona ta‘ape ai lea o le fuamanusina ma lulu aao ma faatofa, ma le loto ua faamalieina, i faaaloaloga aemaise o piuga eseese na tapena ma saunia.
Ua moni ai le upu, Auā o le faamoemoe ua taunuu, o le laau o le soifua lea. Ia faamanuia pea le Atua i lau Susuga i le Toeaina Faatonu ma le Faletua aemaise o le Ekalesia. Ua e faia lava e oe mea silisili, ma e manumalo ai; foi atu le viiga i le Atua.
