O le vaitaimi foi lenei e pei ona faataunuuina i le tausaga ua mavae le tuufaatasia o atumotu o le Pasefika sa faaigoaina o le “South Pacific Islander Christmas in the Park Festival 2014”. Sa auai le tele o aufaafiafia mai atumotu e pei o Toga, Fiti, Nauru, Papua Niu Kini, sui mai le Council, faapea ausiva Samoa e iai le autalavou Katoliko mai Aspley, ausiva a le Heilani Polynesian Group, ma le Miss Samoa Ausetalia – ma le ausiva a le Taupati Faatasi.
Sa fuafua e auai le tele o isi ausiva ma aufaipese peitai sa lē maua se taimi ae viia le Atua sa iai Lona aao taitai na faalaolao le laofie a o faatinoina faafiafiaga ma faagasolo le polokalame o lenei tausaga. E ui lava ina tele taumafa eseese mai isi atumotu ae faananau a le atunuu ia i ana ia taumafa e pei ona iai nisi o le atunuu sa manogi sasala a latou taumafa i le paka.
O le fofoga o le aso o le susuga ia Sulieni Layt. O le tamaitai faifeau Senior Samoa Ps Sitika Lemana Satui sa fai ma sooupu i le va o Samoa ma le media, ma e faafetaia le komiti o le polokalame ona o tusipasi ma meaalofa na o latou faatāuaina ai le galuega faasalalau a alaleo, aemaise o le matagofie o tapenaga.
E toatele nai tamaiti na maua meaalofa tufafua na faatupeina e le Salvation Army. Na logomalie foi le faaili a le kulupu mai Tonga aemaise o le ekalesia Uesiliana Metotisi a Tonga sa teuteuina le mea atoa ma faafiafiaina le aumaimoa. Na faaiuina i saunoaga faalaeiau e le susuga ia Rev Sakalaia Satui ae faaiuina e Rev Nokise ‘Oti i le tatalo ma ta‘ape ai le filialii.
3
