O le faatinoina o le sauniga o le aso fanau o le ekalesia o le Prince of Peace AOG i Mgele, na toe maua ai le mafutaga tuufaatasia a aiga, uo ma ē masani aemaise o nisi o i latou e seāseā maua se avanoa e feiloai ai.
O le Aso Sa ua mavae, 22 o Fepuari na osia ai le taulaga faafetai ma le viiga i le Atua ona ua atoa le uluai tausaga talu ona faatuina mai le Ekalesia o le Prince of Peace AOG. O le aso foi lea ma le masina na faavae ai lenei galuega i le tausaga ua mavae.
O le susuga ia Misa Malae sa fai ma fofoga o le aso ma o ia foi sa faafeiloaia le mamalu o le ekalesia faapea le auvalaaulia. A o le faafeagaiga ia Tilaulelei Kirifi na ia saunia le faamalosi mai le Afioga a le Atua, o le taitai o le mafutaga Tatalo mo Isaraelu (Prayer for Israel) le susuga ia Misa Ben Taala na fofogaina le tatalo faamanuia mo le Ekalesia.
O viiga o le Atua na peseina lava e le aufaipese a le Prince of Peace i Magele. O le susuga i le alii aoao ia Pitoamoa Pesi na feulaina le keke o le aso fanau. O le felanulanuai o meaai o lea aso sa fai ma mafutaga umi e faafesoaai ai le auvalaaulia ma le ekalesia e molimau ai le lelei o le Alii.
O le fofoga lava o le aso le tofa ia Misa Malae sa molimoliina le faafetai ia i latou sa auai atu, ma patipatia faatasi lenei aso fanau, ae o le susuga ia Ailima Seve sa fai ma sui o le auvalaaulia e faaleoina se upu faafetai i le matagofie o le maau ma le milomilosia o le ekalesia.
O le Prince of Peace AOG o loo faifeau ai le susuga ia Tilaulelei Kirifi ma le faletua ia Vailoa Kirifi, e 8 matafale sa amata mai ai lenei galuega, ae o lea ua faamanatu le tasi le tausaga ua 15 aigalotu ua galulue.
O le viiga sili lea i le Atua ona o loo vaaia lava le tupu ma ola o lana ekalesia.
