O le po o le Aso Toonai talu ai na faamanatuina ai mo le taimi muamua i le Laumua i Canberra le Tutoatasi o le Malo o Samoa e ala i se Siva Aloaia (Ball).
O lenei faamoemoe matagofie na faatinoina lava e le Mafutaga a Samoa i le Laumua o loo avea ai le Afioga i le Gafatasi Fuimaono Talatonu Afele ma Taitaifono.
O le ‘afa o le ono i le afiafi na amatalia ai loa taualumaga o le faamoemoe i le usuina o le Vii o le saolotoga ma faagasolo le polokalame i le saunoaga a le afioga i le Sui Kai Komesina o Samoa, le Fetalaiga Fata Brian Kaio sa fai ma sui o le afioga i le Hai Komesina ia Hinauri Petana sa lei auai atu.
O le Afioga i le Gafatasi ia Fuimaono Talatonu Afele na talifuaitau ma momoli le agaga faagaeetia i le afio atu o le sui mamalu o le Malo o Samoa e opogi ma sapai le uluai faamoemoe o le Mafutaga a Samoa i Canberra.
Sa maitauina le sagisagi fiafia ma le sisiva o le aofia e faafeiloai lenei laasaga ua faataunuuina.
O se aufaipese a alo o Samoa mai Niu Sila sa taitaia mai e le susuga Gus Brown Jr na maofa ai le aofia ia latou fatuga ma pesepesega mālie faatasi ai ma le faaili mai Sini le Liua le Vai o Sina na saasaa ai le valaaulia.
Sa malaga atu foi le Fono Aoao a Tagata Samoa i Sini e tali le valaaulia mai ma molimoli atu sa latou meaalofa.
O sui uma o le laulau e aofia ai le fofoga o le po le Tofa ia Taelegalolou Tifaga Nifo o ia foi o le Sui Taitaifono na valaaulia atu le afioga i le Sui Hai Komesina i le taimi sa faamanuiaina ai le Keke o le Faamoemoe ma poipoi ai loa auā le mamalu o le aofia.
E lei gata ai le agaga fiafia ma le taupati o le aofia ae na lē ‘alo foi le toe aapa atu o sui o mafutaga, aiga, uo o le Komiti Faafoe e faatino ni siva Samoa auā pelega o Lupe Faalele.
Sa taualuga ma ta‘ape filemu le filialii ma le mama ua lomi ma le vaa ua goto i tapenaga matagofie sa feagai ma le laulau ma le mafutaga a Samoa i le Laumua, le afioga i le Taitaifono ia Fuimaono Talatonu Afele, le sui Taitaifono ia Taelegalolou Tifaga Nifo, Failautusi ia Elena Sione, le Teutupe ia Sarona T. Stanley, Public Officer ia Katie Faamaile Fonoti ma le mamalu o le Fono.
