Le susuga Opapo Soana‘i Oeti ma lona faletua faapea lona alo tamaitai o Toaipuapuaga ma lona toalua ma le la pepe ina ua mae‘a le sauniga lotu na faamanatu ai le atoaga ole tausaga talu ona vaaia manu‘a ole Faaola ile tino o Toa. Na toe vaaia foi nisi manu‘a o maosiosia i ona vae ma ona lima ile taeao ole Polosesio ale Ekalesia Katoliko i Malotau

Le susuga Opapo Soana‘i Oeti ma lona faletua faapea lona alo tamaitai o Toaipuapuaga ma lona toalua ma le la pepe ina ua mae‘a le sauniga lotu na faamanatu ai le atoaga ole tausaga talu ona vaaia manu‘a ole Faaola ile tino o Toa. Na toe vaaia foi nisi manu‘a o maosiosia i ona vae ma ona lima ile taeao ole Polosesio ale Ekalesia Katoliko i Malotau

Ole Eseta ole 2017 na faamanatu ile Aso Faraile ua mavae ole a lē galo i tagata lotu ole Ekalesia Faapotopotoga Kerisiano Samoa i Siufaga Falelatai. E le gata ole atoaga lea ole tausaga talu ona faaalia Faaaliga ofoofogia o manu‘a ole Alii Faaola ile tino ole alo tamaitai o lē sa avea ma faifeau ole aulotu le tamaitai o Toaipuapuaga, ae ole Aso Maliu mulimuli lea ale susuga Opapo i totonu ole aulotu ona ole a motusia le mafutaga ona o faaiuga ale Autoeaina ale EFKS ua aveesea ai ona tofi faifeau.

Na iloa ele tusitala le faanoanoa ole sauniga faamanatu ma le lotu ole Eseta ale ekalesia ona ole a momotu le mafutaga mafanafana, ae ole lauga na saunia ele susuga Opapo sa iloa lona melotagi i laina o ana saunoaga ae sa faamalosi pea ma taumafai e faalototele i lana aulotu.

O foliga o nisi ole autino i matutua ole aulotu sa iloa lelei mafatiaga oloo latou tauaveina ona e le tau natia mea ua tutupu ile aulotu ua va ai le fogavaa ma nisi o aiga lotu ma matafale ua lē o toe lolotu.

Ole atoaga ole tausaga talu mai le Aso Maliu ole 2016 na vaaia ai ni Faaaliga ofoofogia e le mafai ele tagata ona oo iai lona silafia pe aisea, ole Eseta ole tausaga nei ua atoa iai le tausaga. Ole alo tamaitai o Opapo o Toaipuapuaga ua avea nei ma tagata lotu ole Katoliko. Ole taeao ole Aso Faraile ole Eseta ua mae‘a atu nei sa auai ma ona mātua ile Polosesio ale ekalesia Katoliko i Malotau.

O manu‘anu‘a i vae ma lima o Toaipuapuaga na toe vaaia ile Aso Faraile ua mavae a‘o faamanatu le Eseta ele lalolagi ma Samoa ua atoa ai le tausaga talu ona vaaia ia Faaaliga ile alo tamaitai ole susuga Opapo sa avea ma faifeau ole EFKS Siufaga Falelatai

O manu‘anu‘a i vae ma lima o Toaipuapuaga na toe vaaia ile Aso Faraile ua mavae a‘o faamanatu le Eseta ele lalolagi ma Samoa ua atoa ai le tausaga talu ona vaaia ia Faaaliga ile alo tamaitai ole susuga Opapo sa avea ma faifeau ole EFKS Siufaga Falelatai

Na faamatala le faletua o Opapo le tina o Toa na vaaia ai foi manu‘a o faalavalava ile tino o Toa i ona vae ma ona lima ae e lei vaaia ni manu‘a ole pale, le itu, ma vae i faailoga o fao na tutu‘i ai aao ole Faaola. Na molimauina manu‘a o faalavalava ile taimi na sasa ai le Faaola i ona puapuaga ina ua susue e Toa lona laei ma faailoa ane ona vae ma ona lima (silasila ile ata).

E oo lava ile tusitala e le oo lona iloa i vaaiga nei auā e na ole Atua soifua nate silafia. Peitai na tuu atu nai fesili ile tamaitai o Toa mo sona finagalo. Na fesiligia o ia poo le ā sana tala i nisi tagata oloo tauemu ma faifai ia te ia ma lona aiga. Fai mai Toa e leai sana tala e faia ae tuu pea le tagata e le talitonu e fai lona saolotoga e faaali ai o latou manatu.

Ole Aoga Aso Sa ale EFKS Siufaga e aofia ai fanau ma faiaoga na latou saunia se tala ole Eseta e faamanatu ai le atoaga ole tausaga talu ona faaalia ise tasi o alo ma tamafanau ale ekalesia Faaaliga o manu‘a ole Faaola.

E faamomoiloto lagona ile tala na saunia ma na molimauina lea ile loifofoga maligi o nisi sa auai ile sauniga. Ole Aso Sa o lumanai nei ole toe Aso Sa lea ole susuga Opapo ma lona aiga ile aulotu ua 23 tausaga o galulue ai, ona tuua lea ma taliu atu ile aiga. Ia manuia tele fuafuaga ole lumanai ole a feagai ma le susuga Opapo ma lona faletua ma le nofo a alo.

Comments

comments