E ese foi le filifaaosofia i le mafuta faatasi o nai o tatou mātua matutua, ma tuaa sinasina mai isi atunuu o le Pasefika. E ui i le eseese o gagana ma atunuu ae ua lē afaina lea ia i latou i le talatalanoa faatasi i le gagana lona lua (English) ua pei ai lava lea o se aiga e tasi.
O le malosi o le lagolago a le Vaka Tautua i polokalame a tagata matutua o le Pasefika i le latou kulupu ua faaigoaina o le Pacific Island Health Trust ua maitauina ai le faatuputulaia o mafutaga a atunuu taitasi, e pei o Tonga, Niue, Samoa, Tuvalu ma Cook Island.
O le fesoasoani a lenei faalapotopotoga o le tuuina atu lea o ni tupe i kulupu a atunuu taitasi e faatino ai ni mea e fai i totonu o mafutaga, faatasi ai ma le auai atu o nisi e faasoa i nai tamā ma tina matutua i ni vaega e aua ai ne‘i aafia i latou i le tino ma‘i.
Ua mae‘a foi ona faatulagaina aso taitasi o le vaiaso e agai atu ai nei sui o le Vaka Tautua i totonu o kulupu a atunuu. O Samoa e lua ana team o loo auai i lenei faamoemoe, o le Mafutaga Tatalo a Mascot i Magele o loo taitai ai le susuga i le faafeagaiga ia Fatu Mataia, faapea Logoitino Matagi lelei i Manukau o lo taitai mai ai le faletua ia Lilieni Bamber. O Aso Lua uma ua faatulagaina e feiloai ai le kulupu a le Logoitino Matagilelei ma sui o le Vaka Tautua ae o Aso Gafua o le Mafutaga Tatalo a Mascot i Magele.
O le taeao o le Aso Faraile na avea ma aso atofaina e feiloai uma ai nei atunuu e lima e fiafia ma tuufaatasi ai tagata matutua ma tufatufa ai ni faailoga mo i latou ua matagofie a latou meataulima sa faatinoina i totonu o kulupu taitasi.
O mātua ua silia i le 60 tausaga agai i luga sa auai, o sui faipule o le Pasefika, le Tofa Su‘a William Sio, Jenny Salesa, Carmel Sepuloni, ma le afioga i le Minisita ia Peseta Sam Lotu Iiga.
O le team mai Tonga na latou lagiina le pese lotu e tatala ai le polokalame ma saunoa aloaia ai loa le taitai o le Vaka Tautua ia Vui Mark Gosche e uiga i lenei faamoemoe. O saunoaga autu o le aso o le afioga i le faipule o le itumalo o Magele ia Su‘a William Sio faatasi ai ma le afioga i le Minisita ia Peseta Sam Lotu Iiga.
Na sosoo ai ma le tauaaoina o Ipu poo faailoga mo sui taitoalua ua filifilia mai i team taitasi. E tufatufa lava faailoga ma faatino aitema a le atunuu lava latou e ala i se pese poo ni siva.
O tuaa matutua o Samoa sa faamanuiaina i lenei polokalame o le tofa ia Tologataua Tauiliili, ma le tina matua ia Ausa Naomi Timoti mai le kulupu a Logoitino Matagi Lelei, ae o le Mafutaga Tatalo a Mascot i Magele o le tamā ia Faalogo Talavini Kuresa ma le tina ia Sitoga Masina Matagofie le tauaaoina o faailoga a nei tuaa matutua o le atunuu ina ua pepese ai mātua ae see faataupou mai ai le tofa ia Tologataua Tauiliili e fai ma manaia ae aiuli mai ai le fai malu ma nisi o lenei mafutaga.
Lagona le fiafia ma le faageetia o i latou uma sa auai i le faasoasoaina e le fofoga o le aso o le polokalame le tamaitai ia Yolande Ah Chong. Taualuga le faamoemoe i le felanulauai o taumafataga ma le tu‘itu‘i o le musika na matuā iloga na faipaga ai toeaiiina ma loomatutua.
Telē le tāua o lenei faamoemoe mo tuaa sinasina auā e omai e tafao ai ma maua ai foi taaloga e taalo ai ma mafuta ai ma nisi foi mātua mautua. Ua iai foi le isi tapenaga a le Vaka Tautua mo le tausaga fou i se isi faamoemoe faapenei e pei ona faatinoina i tausaga taitasi.
