O le vaiaso atoa lenei i le mae‘a ai o le Aso Sa Paepae o le fanau, ua faataautaia ai le faaaliga tele a le Ofisa o Faatoaga i le motu tele i Salafai. O se aso sa fauao, faupo, ma ua toatele faifaatoaga ua lesitala mo le faaaliga tele o fua o faaeleeleaga atoa ai lafumanu ma faasao o le gataifale.
O se taumafaiga lenei a le Malo ina ia faaopoopo taumafa maua i Samoa, o se tali atu foi a le Atunuu i aiaiga ua faataatitia mai e le Faalapotopotoga o Malo Aufaatasi, i lona lala o Taumafa faapea ai Faatoaga le FAO (Food and Agriculture Organisation) lea ua tuu mai ai e faagata i le tausaga fou Manulauti o le Meleniuma (Millenium Development Goals) e tatau ona ausia uma e atunuu o le lalolagi. O le tasi la lenei o vaega tāua o ia manulauti ina ia mafai e atunuu uma o loo i le lio a Malo Aufaatasi ona ausia le lava o taumafa mo ona tagatānuu pe a oo atu i le tausaga fou.
O se faiga ua unai e Samoa ina ia toe agai ai le toatele e toto le eleele ma atinae auā le taumafa e tatau ona maua aemaise foi le unai ai o tamaoaiga o atunuu taitasi. O lea na faatautaia i le taimi tonu o le fono a malo laiti tau atiae o le Lalolagi, le SIDS le faaaliga a faifaatoaga ma failafumanu i Upolu, ma na faatumulia e le gata i le mamalu o le atunuu ae faapea foi sui usufono o le SIDS.
O le taimi lenei ua mautinoa le tele o taumafa ua maua aemaise i maumaga talo ma le fa‘i ae o le tulaga maaleale lava o le tau o Samoa e faigofie ai lava le oge i le atunuu. O lea foi la ua agai le Matagaluega o Faatoaga ina ia toto isi ituaiga laau e pei o le alaisa i Samoa ina ia mafai ona iai ni taumafa e ese mai i le talo, fa‘i, taamu, ufi ma le ulu. O afā fulifao ua mae‘a atu faapea ai lologa na faaleagaina ai le tele o vaega nei o faatoaga a nuu na aafia, ma o le alaisa lava na tele ina vaaia le tufa mo le taumafa ae o le suesuega ua faatautaia ma ua faatino ina ua aafia Samoa i le lega, o lea la ua vaaia ai le tele o ituaiga talo ua maua ma ua vaaia le faatau i totonu o le atunuu i le taimi lenei.
Ua tele foi ituaiga o aufai ua molimauina le faatau i le atunuu ae e lē o taofia ai ma lafumanu atoa ai le agai a nuu ina ia toe unai faasao o le gataifale e pei ona vaaia i faasao o le faisua faapea ai le unai o le faamamā ma le puipuia o faataufusi mo le anae, le paa, ma isi figota o le sami.
Ua tele foi atinae o le i‘a o le tilapia lea e faasao i le vai magalo, ma o nisi nei o atinae ua faapea ona lagolagoina e le Malo ina ia faatele ai le taumafa e maua e oo i taimi o le afatia o Samoa i suiga ogaoga o le tau.
O le vaiaso atoa la lenei aemaise aso muamua e tolu o le a faatino ai le faaaliga lea i le motu tele i Salafai, ma o le Aso Tofi o le vaiaso lava lenei o le a faatino ai ma le faamanatuga o le aso mo taumafa Samoa, lea e faatautaia foi lona sauniga aloaia i le motu tele i Salafai. O le taualuga o le faaaliga lenei a Faifaatoaga o le atunuu o le a tufatufa ai faailoga tupe mo faifaatoaga ua maoa‘e a latou atinae ma ua vaaia le manuia o a latou atinae tau lafumanu. O lea foi o le a tatala ai ma se fale ua patino i le ofisa o faatoaga i le motu tele i le afioaga lea o Sapapalii.
O le faamoemoe o le Matagaluega ina ia vaaia se suiga tele i le itu tau i fua o faaeleeleaga aemaise o lafumanu ma faasao o le gataifale i Savaii, ma saga unai ai ona fai faatoaga e faaauau nei atinae i le agai i luma.
