O le Aso Gafua na faamanatuina ai le ‘Australia Day’ poo le aso faapitoa e sami ai le matagofie, tamaoaiga ma le saogalemu mai le tele o tausaga ua tuanai o le atunuu tele o Ausetalia. O se aso aloaia i le kalena a le malo tele ma o se taimi e vaaia ai le tutu faatasi ma fiafia uma ai tagatānuu i le aso 26 o Ianuari i tausaga uma.
Ae peitai mo tagatānuu muamua o Ausetalia poo Aporiti o se aso pogisa ma le faanoanoa auā o le aso na taunuu ai le uluai vaa o pagota ma fitafita mai Peretania tele (first fleet) e pulea ma nofoia Ausetalia. O lenei lava tu laueleele mai o fitafita ma pagota e faia Niu Sa Uelese ma kolone mo pagota (penal colony) na sologa mai ai loa ma le puleaga malosi a Peretania Tele ma pulea Ausetalia.
Mo tagata Aporiti, e latou te faaigoaina lava lenei aso o le aso na osofai ai (invasion day) lo latou atunuu. Ae peitai ua manumalo lava le atinae ma le faatupulaia o le tamaoaiga faapea le nonofo faatasi o ituaiga tagatānuu eseese (multiculturalism) i lenei atunuu seia oo mai i le aso. O nisi o nei atunuu ma ona tagata ua avea nei Ausetalia ma o latou atunuu lona lua o tagata Samoa.
Ua vaaia le mautu foi o ana ofisa o le Hai Komesina i Canberra lea ua vaaia nei e le afioga Fata Brian Kaio aemaise le ofisa o le konesula i Sini lea e galue ai nei le afioga Fonoti Manogiamanu Etuale Ioane ma le aufaigaluega. I se faaopoopoga fou ua toe faatu i ai nei ma se Ofisa fou o le turisi i Sini lea ua tofia mai ai e le Malo a Samoa le susuga Fasitau Ula.
I le tele o nisi Samoa e maupaolo atu i palagi Ausetalia o se avanoa e sapai ai tu ma agaifanua e lua ma atili saili manuia ai pea i lenei atunuu matagofie. E lē gata ia manuia le fanau i aoga ma taaloga ae o le saili ma malamalama pea i tu ma masani a Samoa.
O le tulaga lea o loo iai le mafutaga a le tamaitai Samoa ia Serapina Salesa Caleo faapea si ona toalua palagi ia Patrick Caleo. Na masani i laua i le Iunivesite o Townsville i Kuiniselani lea sa sailia ai o la faailoga ma faauuina ai i le 1999.
O le 2002 na malaga atu ai Patrick Caleo ma faaipoipo ma lana manamea i Samoa ae lei siitia mai i Melepone ae faaiu mai Jannali i Sini.
E toalua o la alo tamaitai na fananau i Sini o Grace i le 2005 faapea Moana 2006. O le alii o Patrick o se Marine Biologist ma ua masani foi i faalavelave Samoa ma e malaga soo lava ma lona aiga e tafafao i Samoa.
“O Samoa e ese le matagofie ma le ofoofogia o ona tagata, e lē tele se tamaoaiga o tagata uma ae ese le ola fiafia. Ou te alofa tele i tagata Samoa ma o latou uiga nei.” Faailoa e le tina ia Serapina le aogā tele mo Moana ma Grace o le iloa o latou aiga i Samoa faapea le gagana aemaise Siva ma Pese Samoa. Na valaaulia foi o la aiga Samoa mo se tafaoga i le matafaga i Bundeena, Sini faapea se Aussie BBQ i lo la maota lea na fia ai foi ni faafiafiaga e pei ona masani ai le fanau.
Ua iai foi fuafuaga mamao e taliu atu ma ritaea i si o tatou atunuu ae mo le taimi nei o le faaaogāina o avanoa e tele i aoaoga ma taaloga o loo maua i Ausetalia nei ma viia ai pea e alofa o le Atua i lenei atunuu matagofie o Ausetalia.
