Faamanatu le 80 tausaga o le tina matua ia Faanoanoa Tagaloa Matua

Na faamanatuina le aso soifua o le tina matua i le Aso Toonai aso 24 Aukuso ma o se faamoemoe na faafiafiaina ai o ia e ala i tapenaga a alo ma fanau aemaise aiga atoa.     O le tamaa ia Tagaloa Matua mai Lalomauga. E toafitu le nofoaalo o Filoinuulelei, Pevise Kavasa, Violeta, Mauola, Vani, ma Faavae.
E ova ma le 20 alo ma fanau a fanau na tupuga mai le tina matua ia Faanoanoa.         Sa taitaia lava le sauniga e le susuga i le Feagaiga Taulagi ia Rev Isamaeli Liaina mai le ekalesia EFKS Logan East ae tapenaina le taumafataga e le Uncle Sam’s take away, le tofa ia Poulava ma le tausi ia Lorna faleaiga e pei ona faataunuuina i le itu i Saute o Brisbane.
O le Fofoga o le aso o le alo lava o le tina matua le susuga ia Faavae Tagaloa Matua (faafeagaiga) ae o faaaloaloga a le aiga sa feagai ma Fiaseu Isaia. O le failautusi a le ekalesia EFKS Logan East le susuga ia Ape Lemalu sa fai ma sui o le auvalaaulia e faafetaia aiganalua ona o faaaloaloga matagofie.
Na maualuga le aso ona sa malaga mai foi le uso o le tamā ia Tagaloa Matua mai Samoa le susuga i le faafeagaiga ia Tagiolevao ma le faletua ia Pevise Tagaloamatua e molimauina le aso fiafia o le tina.
O alofaaga ma faamanuiaga lē mavae mo     oe le tina pele Faanoanoa i lou aso soifua ua mafai ona e aulia mai.
Alofaaga mai ia Paepaelei ma Faaluaseu Savaiinaea & fanau, Fofoaivaoese Tagaloa Matua ma le fanau, ma aiga atoa faapea lau fanau ma taitoalua ma fanau a au fanau, aemaise alofaaga faasilisili mai le tamā ia Tagaloa Matua ma le aiga atoa.
Manuia lou 80 tausaga!