Faamanatu le 53 Tausaga o le Aufaipese PIC Otara

Aufaipese Ekalesia PIC Otara
Aufaipese Ekalesia PIC Otara

Na faavaeina mai le aufaipese ale Ekalesia PIC i Otara ile tausaga e 1963 e tagata e 20, peitai ua tupu ma ola le galuega ma ua vaaia ai foi le totō faaua o faamanuiaga ale Atua i totonu o lana galuega ma ua ausia ai ele aufaipese le 79 o tagata mai tamā ma tina matutua seia oo lava i tupulaga talavou ua ofoina o latou siufofoga mole peseina o viiga ole Atua.

Ua 53 nei tausaga talu ona faavaeina mai lea itutino ole galuega ma ose fiafiaga sili lea ile susuga ile Toeaina ia Aotofaga Lemuelu faapea taitai pese ia Muagututia Muagututia male faletua ia Loia Tuafafo ona ole alofa ole Atua i totonu ole Ekalesia. E ui ile tele o luitau sa feagai male aufaipese i tausaga taitasi ae molimauina pea le leai ose faalogologotiga.

Ole Aso Toonai ua mavae, 17 o Setema na patipatia ai le atoaga ole 53 tausaga talu ona faavae mai le aufaipese lenei ale PIC. Ole susuga ile faafeagaiga ia Uea Tuleia ole faifeau PIC Niue sa ia taitaiina le sauniga, e sui tulaga ile toeaina ia Aotofaga Lemuelu ona oloo gasegase ae sa auai lava ile molimauina ole lotu faamanatu ale aufaipese.

Ole faletua ia Fitutasi Talataina sa ia faitauina le Afioga Paia ale Atua ile gagana Samoa ae o Faanunu Aneru sa ia faitauina ile gagana peretania.

Ole upu faauuina ale Atua sa fofogaina lea ele taitaipese ia Muagututia Muagututia lea sa faaautu lana faamalosi e faapea, “A ua ou iloa se mea ia te oe, ona ua e tuua lou uluai alofa.”

Taitai pese ma lana laulau (laina luma) ma faiaoga ile laina i tua
Taitai pese ma lana laulau (laina luma) ma faiaoga ile laina i tua

Ole tala ile galuega na saunoa iai le isi taitaipese, le tina le faletua ia Loia Tuafafo, na ia faafetai ai ile aufaipese e tusa ai male galuega fita oloo fai i Aso Sa taitasi auā le faaleleia o viiga ole Atua, auā ole tasi lea vaega e pito sili ona tāua i totonu ose sauniga.

Ole molimau foi lea ile mamalu ole atunuu, faapea le aufaipese a Niue ma Rarotonga sa auai i lea faamoemoe ile Aso Toonai, ole manaia male matagofie o tapenaga ole aufaipese sa lagiina ai viiga ole Atua, ae le gata i lea ole latou togiga fou lea sa laeiina auā lava lo latou faamoemoe. Sa tufatufina foi ni meaalofa mo sui taitasi ole aufaipese e oo lava i fanau, ae sili ai le tamā matua ia Muliaga sa ia mauaina se faailoga ole tagata e lei misi lava sana pese. O polokalame ole aso na faaauauina lea ile hall ale ekalesia, sa fai ai le taumafataga, ma faafiafiaga sa tapenaina lea e autalavou mai Niue, Rarotonga male autalavou ale PIC Samoa.

Ole susuga lava ile taitai pese ia Muagututia sa fai ma fofoga ole aso, o ia foi sa faia faaaloaloga mole mamalu ole auvalaaulia. Na iloga ona luuluu lea aso i faaaloaloga auā  Faafeagaiga sa molimauina le faamoemoe, faapea foi  faiaoga poo faipese ole aufaipese, sa faasafua uma iai faigameaalofa.

Ole susuga ia Muagututia Muagututia faapea le faletua ia Loia Tuafafo o taitaipese ia sa taitaiina mai le galuega i lenei lua tausaga faatasi ai male teutupe ia Faanunu Aneru male sui teutupe ia Fitutasi Talataina, ma ole Aso Lulu ole vaiaso nei ole a toe faia ai le faiga filifiliga ale aufaipese mo se isi laulau fou latou te tauaveina le galuega ile isi lua tausaga.