Sa faatumulia le Maota o Marconi i Bossley Park i Sini i le po o le Aso Faraile na tea nei i le faamanatuina o le limasefulu tausaga o le soifua o se tasi o auauna a le Atua i Sini nei, le susuga Ps Fred Mauala Wilson o le Ekalesia ‘God’s Love Never Fails.’
O le susuga i le faifeau o se lupe faalele a le afioaga o Moataa a o lona faletua ia Fereni Maiava Wilson mai le afioaga o Faleasiu ma Avao na faafeiloaia le valaaulia. Na amata le sauniga i se faalaeiau a le susuga i le aoao fesoasoani Eneata Toilalo ma faafetaia le alofa o le Atua ua ia taitai maia le soifua o le susuga i le faifeau i nei mau tausaga o lona soifua.
Sa ia momoli foi le faamalo i le tamā o le ekalesia i lana auaunaga ma le faletua i le tauasuina o le ipuvai o le ola ma tiute i totonu lava o si o latou aulotu. Na taualuga lea i le tatalo faafetai ma amata ai loa fiafiaga o le aso fanau. O nisi o faifeau na aofia e iai le susuga Ps Mauola Tavete ma le Faletua ia Emi mai le Worship Centre aemaise le susuga ia Vaelaa Iosefa Filipo mai le Papatoetoe Unity Christian Church auā le aso faapitoa o Ps Fred Mauala Wilson.
Na sosoo ai ma le molimau a le fanau na saunia e le ulumatua ia Nathan Wilson. Na toe manatu le atalii i le fita o le soifuaga na amata mai ai lo latou aiga i le taunuu mai i Sini i le tausaga 2003 mai Aukilani Niu Sila faatoa sefulutolu ona tausaga ma sa taumafai lava si o latou tamā, fesoasoani ai ma le tina ina ia manuia lo latou aiga, ina ua faigaluega le tamā i le kamupani nofoaafi sosoo ai ma le faauuina o le tofi faifeau o nai mātua.
O le tausaga e 1998 na mae‘a ai aoaoga faatalalelei ma le Tusi Paia a Ps Fred Mauala Wilson mai le Kolisi Aoga Tusi Paia a le “New Covenant Bible College” i Mt Albert Aukilani Niu Sila. Ma o le Ekalesia a le “God’s Love Never Fails” i le tuatusi 103 Restwell Rd, Bossley Park NSW e to‘a luasefululima matafale o loo galulue ma tapuai ai.
O toeaiina fesoasoani o le Ekalesia o le susuga George & Tina Fidow, Manu ma Annie Tuiloma, Tolo ma Mena Avaiti faapea le faletua ia Leitu Solopo. O le teutupe o Lisa Pili faapea le failautusi ia Annie Tuiloma ma le Public Oficer ia Maopolo Aumua.
E talafeauga foi le faamanatu o le 50 tausaga o le faifeau ua avea foi o ia ma sui o le Laulau Faatonu (Board) lea e toaono sui o loo aofia ai. Ua avea foi ma meaalofa sili i le faifeau le ola o le tupulaga (Youth) lea e taitai ai ma le faletua ia Fereni i tina, a o le taitai o tamā o susuga ia Sega Tuimaseve.
O le taitai aoga Aso Sa o Aino ma John Maatusi ma le komiti o taaloga lea e iai Michael Nanai, Nathan Wilson, Daniel Leaupepe, Faalili Leaupepe ma Junior Lokeni. E mitamita lava foi le ekalesia i ana tama fanau talavou ua faaeaina i taaloga lakapi liki e pei o FJ (Fred Jr) o loo taalo nei i le Holden Cup a le Parramatta i le numera sefulu, o le isi fetu pupula e igoa ia Michael Ki o loo taalo nei i le U20 a le NZ Warriors aemaise Sam Manuleleua o le Rabbitohs.
O nisi sui o lenei Ekalesia e aofia ai le tina ia Penelope le tuafafine o le alii Palemia o Samoa le Afioga ia Tuilaepa Sailele Malielegaoi lea e aulotu ai ma lana tama teine ia Avamoana. O le tamā aupito matua o le Ekalesia o le toeaina ia Maalo Aumua Maapulu.
I lana saunoaga autu na faafetaia ai foi e le Faifeau lana ekalesia mo le lagolago i le galuega a le Atua faapea foi i si ona faletua ma lana fanau tama e toalua mo le tapenaina o le aso fanau matagofie, taumafataga mamafa a le Star Buffet ma meaalofa e tele.
Na faalauiloa ai foi ma le togiga a lana komiti o taaloga o se meaalofa mo le aso fanau. Na matuā faamalieina le aofia i le taumafataga ma poipoi ai le keke o le limasefulu. I taualumaga lava o le limasefulu tausaga o Ps Fred Mauala Wilson na valaaulia ai foi i luga o le Leitio FM89.3 le paia ma le mamalu o le atunuu o saili se ekalesia e tapuai ai o loo tatala mai le malumalu o le ‘GLNF’ i le tuatusi 103 Restwell Road, i Bossley Park NSW poo telefoni 0423056058 ma le 02 8798 0804.
