Na osia le Misasa paia e le afioga ia Patele Epati Tamati Aiolupotea i le Aso Sa ua tuanai, aso 8 o Fepuari.
Sa faatinoina lava vaega uma e pei ona masani ai le ekalesia, o le momoliina lea o le taulaga ma nisi tu ma aga masani o tapuaiga.
Sa lagolagosua le afioga i le Tiakono ia Kelemete Taala. Na auai foi le Taitaifono a le Ekalesia Katoliko le susuga ia Faamatuainu Ili Taualai.
E toatele lava i latou sa auai auā sa valaaulia ofisa o Senakolo o le faleono e aofia ai, Woodrige – lona Peresetene o Lofipo Tositelo Afakasi; Senakolo a Darra – lona Peresetene o Malo Lafaele; Inala – Ana Otemai Tenisio; Goodna – Wiki Vaoiva; Jinderly – Malae‘ulu Toleafoa Talitimu; Caboolture – Seiuli Pako.
Na lagiina viiga o le Atua e le aufaipese logomalie a le aulotu Samoa a Woodridge.
O le tofa ia Sauafu Siaosi Silao sa fai ma fofoga o le aso ae o le afioga ia Leota Tevaga Tomeniko sa fai ma sui o le auvalaaulia e momoli se agaga faafetai i le matagofie o le ma‘au ma le milomilosia o le ekalesia.
