Mai i le $5 (tala Samoa)lea na faamauina o le tupe faavae lea o le Iunivesite Aoao o Samoa, e matautia le saosaoa o le atinae o le Iunivesite muamua lenei a le atunuu. Talu lava le amataga o le tausaga na tele polokalame e faamanatu ai le atoaga o le 30 o tausaga talu ona faavae lenei Iunivesite ma o se nofoaga tutotonu ua agai iai le atunuu mo sailiiliga aemaise o le atina’e o le poto salalau.
O le tala o le $5 na muai faatū ai lenei aoga maualuga, o se vaega lea e maofa ai le toatele i soo se itu o le lalolagi e faalogo i ai aemaise foi i Iunivesite tetele o le lalolagi.
Faaalia e le Alii Palemia na o le faavalevalea lava le tala na feto‘ai ma le Tootooalii, le alii Palemia na faavaeina lea aoga, ua lalau ai le fai miti suavaia o le malo i lea taimi. Na faatusa e le Susuga Tuilaepa Lupesoliai Sailele Malielegaoi finauga i le Palemene ma tusitusiga a nusipepa o le malosi o le tsunami i le feita ma le lē talitonuina o fuafuaga alualu mamao a le Malo.
E ui i lea na faatino lava e pei ona sa iai le nofoaga muamua o le Iunivesite, lea sa i le lotoā o le ofisa o aoga i Malifa. Na mulimuli ane agai i Lepapaigalagala ina ua mae‘a ona fausia lona nofoaga tutotonu fou ma o le atoa ai o le 30 o tausaga o le Iunivesite Aoao o Samoa na manatua ai tamā o le atunuu na o latou finau pea e ui i faitioga ina ia faatū se aoga maualuga faapea i le atunuu.
O le sini autu na tumau ai le finauga, faaalia e le Alii Palemia ina ia faaauau lenei aoaoga, ina ia iai se aoga maualuga faa-Iunivesite e tatala ai le avanoa mo aoaoga maualuluga mo faailoga tipiloma, tikeri ma tusipasi. E lē gata i lea o le iai o le Iunivesite i Samoa nei o le a tuuitiitia ai le numera o fanau a le atunuu ua agai i fafo e saili ai le faalautele o le atamai i le maualuga lea, i aoga faaiunivesite.
O le taimi lenei ua tele iunivesite i Niu Sila, Ausetalia ma Amerika ua fesootai nei ma le Iunivesite Aoao o Samoa auā le faamautu ai o maliega ua mafai ai ona amanaia faailoga o lenei iunivesite i ia foi nofoaga o aoaoga i atunuu i fafo, ma o se fiafiaga tele lea na toe faafetaia ai e le Alii Palemia le tofa na a‘e i taitai o le atunuu i lea vaitaimi mo le faatūina o le Iunivesite Aoao o Samoa i Lepapaigalagala.
O se solo tele amata mai lava i le vasega faavae o le NUS e pei ona silafia ai seia oo mai i le fanau o loo aooga i le taimi lenei i Lepapaigalagala, na savali uma lava i le faaaloalo lea na faia i magaala o le taulaga o Apia agai i le Maota o le Malo mo le sauniga e aloaia ai lenei aso faamanatu.
O le Afioga Le Mamea Ropati, lea sa Minisita o Aoga i le taimi o le tau afuafua mai o lenei aoga na ave i ai le faaaloalo na te alaluaina le keke o le Aso Fanau ma o lana foi lea faafetai ona ua aulia mai e le Iunivesite Aoao o Samoa lenei laasaga maualuga ma le faamoemoe ia saga faaopoopo le numera o tagatānuu o Samoa e faamanuiaina ai e ala i le tomai ua maua i lenei aoga maualuga.
