O se mea lelei tele le mafuta ma fegalegaelai o uo ma ē masani aemaise o aiga i se faamoemoe ua taunuu auā o le laau o le soifua manuia lea aemaise o le loto e faafoi ai le viiga i le Atua, auā ua aulia manuia mai e le atalii, le susuga ia Joshua Tasi Tafili le 21 o tausaga o lona soifua.
Sa faatumulia ai le nofoaga o le Ekalesia i East Tamaki i le afiafi o le Aso Toonai lea na fai ai le fiafia o le faamanatuina ma le faatāuaina o le soifuaga o le atalii.
Matagofie le apoapoaiga a le susuga i le faafeagaiga, Susuga Rev. Michael Wilson na saunia le lotu faafetai o le aso auā le tomatauina o le soifua auauna ma le soifua galue o le atalii, le susuga ia Josuha Tasi Tafili auā le agai pea i luma o lona soifua talavou.
Na saunoa le faifeau i le matagofie ma le uigaese foi o le soifua tuputupu a‘e o le atalii i lana maitau i le la mafutaga i totonu o le galuega a le Atua. E tele ni taleni na faamamafaina i le saunoaga a le susuga i le faifeau ma na faatāuaina ai le faasoa mai auā le faafofoga a le tupulaga mo le lu‘iina o lo latou ola talavou.
Sa momoli foi le faamalo a le faifeau i le susuga ia Tasi e tusa mo lona soifua faaoloaina i ana taleni faamusika, o le taalo aemaise ai le faaalia o le loto faafetai ma le agaga mitamita o le tamā faaleagaga e ala i le faatinoina o ni tala pupuu faaleagaga ma le tele lava o lona tomai e faatinoina ai fuafuaga mo le autalavou i totonu o le latou aulotu.
Saunoa foi le tuaa o Tasi le susuga ia Lanu Tafili e ave le faamalosi ma le fautuaga faamatua alofa moni e tapasaina ai le malaga faaauau a le atalii aemaise foi o le faamanatu tāua e tusa ma le tulafono e 5, o le ava ma le usiusitai i mātua o le faaumiumi foi lea ona ola ma soifua e tusa ma le finagalo o le Atua.
Ona faaiuina foi lea o le mafutaga ina ua taumamafa ma laulelei le paia o le aufaigaluega a le Atua, o le mamalu o le Ekalesia aemaise foi o le auvalaaulia i tausamiga mo le tino, ta‘ape ai foi lea ma le mama ua lomi ma le vaa ua goto i le tele ma le felanulanuai o taumafataga na saunia lelei e mātua o Joshua Tasi ma nai o latou aiga uma mai nisi foi vaega o le kelope ma Aotearoa nei.
Ia Joshua Tasi o moomooga alofa ma faamanuiaga mo oe mai ou aiga uma lava i soo se vaega o le lalolagi, o uō ma aumea mamae aemaise o le Susuga i le Faafeagaiga ma le faletua ma le paia ma le mamalu o le Ekalesia Revival Christian Church i Otara ae faasilisili alofaaga mo oe mai ou mātua peleina ia Lanu & Valu Tafili, o lou uso ma nai ou tuafāfine. Ia manuia tele lou aso soifua Tasi ma ia faamanuia tele pea le Atua i lou soifua auauna ina ia na faaaogāina pea oe mo soo se feau ma soo se galuega e finagalo i ai le Atua.
