O le titi faitama o mātua ma aiga na tuua ai nofoaga ma atunuu o loo aumau ai ae malaga mai i Ueligitone e patipatia faatasi le atoaga o le 21 tausaga o le tamaitai ia Faith Vaa lea sa faataunuuina i le aso 4 o Ianuari.
O aiga mai Samoa, Ausetalia ma Aukilani na faatasi uma atu i lea aso e sii faatasi la viiga i le Atua ona o nei tausaga e tele ua toe faaopoopo i lea tamaitai talavou. O le taitai o le sauniga o le susuga i le faafeagaiga ia Faaluatele Ape Talosaga Savea o le Ekalesia Holy Valley Samoan Assembly of God i Naenae.
O le faafeagaiga o le Ekalesia AOG Papatoetoe ia Fia Niu Sila na saunia le upu faamalosi mo le tamaitai fai aso fanau faapea le auvalaaulia sa molimauina lenei aso fiafia. O le tauaaoina o le ki na foaiina lea e le tina ia Totoa Vaa, ma na molimau ai foi le tina i le olaga aoga ma le galue o si ana tama. Na saunoa le tina o se teine e usitai ma toaga i le lotu, e loto alofa foi i lona aiga, sa aoga o ia i Randwick School faapea le kolisi a Naenae.
Na mae‘a le sauniga ona see loa lea i le maota o le Ekalesia EFKS i Lower Hutt mo le taumafataga. O le Fofoga o le aso o le susuga ia Malesi Vaa, ae o le afioga ia Nanai Lave sa fai ma sui o aiga na lua e molimoli se faafetai ma ni meaalofa i susuga i faafeagaiga ma le mamalu o le auvalaauli sa auai.
O Faith Vaa o le uii lea o le fanau o loo aumau nei o ia ma lona tina i Ausetalia ma faigaluega ai, ae ua tauasa mamao mai lava i Ueligitone e faamanatu ai lona aso soifua ona o lana ekalesia sa faafailele ai lona soifua faapea le nofoaga sa aotauina ai i aoaoga. O Faith e mai le afioaga o Sagone i Savaii ma Matautu i Falelatai.
