O faamanuiaga ma alofaaga o le aiga o le tamaitai ia Muna Sandra Nepo faapea uo ma ē masani na momoli faapitoa ile aoauli o le Aso Toonai ua mavae, 11 o Iuni ile taimi na patipatia ai ma faamanatuina le atoaga o lona 21 tausaga ile malumalu o le Destiny Church i Manukau.
E ui o se tamaitai e maua i ma‘i o le tino ae sa vaaia le tutu malosi o ona mātua faapea ona uso ma lona tuagane e fai se aso fiafia e momoli ai o latou alofaaga mo lona aso soifua.
Ua faailoa tino le alofa o mātua i tapenaga eseese sa fai, aemaise ai o le saunoaga a le susuga ile faafeagaiga ia Siifua Lepua na ia faafetai ai i mātua sa fanauina le tamaitai ia Muna Sandra faatasi ai ma le alofa o le Atua ona o nei tausaga e tele ua ia aulia. O le pele o Sandra Nepo i ona aiga uma na vaaia ai le matagofie o aitema na saunia e ona uso ma ona auaiga e faailoa ai lo latou alolofa ia te ia.
O nisi o ona aiga o loo aumau i Tutuila, Samoa, Ausetalia ma Amerika sa lē mafai ona auai mai ae sa momoli mai o latou alofaaga ma faamanuiaga i lona aso soifua, faatasi ai ma faamanuiaga mai lana Ekalesia o le CFC (Congregational Fellowship Church) i Manukau.
O alofaaga ma faamanuiaga molipo mai ona mātua ia Ilai Amatafafai Nepo ma lona tina ia Rita Nepo ma lona aiga atoa i Niu Sila. Ia faamanuia le Atua i lou aso fanau Muna Sandra Nepo Auvaa!
