Faamanatu le 125 tausaga o le Felela Malisi

O loo faagasolo i le vaiaso lenei le faamanatuga o le atoaga o le 125 o tausaga talu ona tulaueleele Felela Malisi mai i fafo ma faavae le aoga o le Malisi i Mulivai. O i latou uma ua ta‘ua o tama tuai ma teine tuai o le Malisi ua tuufaatasia uma i lenei vaiaso auā polokalame o le faamanatuga o lenei tausaga tāua.
O se tasi lenei o aoga aupito leva i totonu o Samoa ma ua tele ma anoanoai lona sao e lē gata i le atinae o aoaoga mo augatupulaga e tele o le atunuu ae o loo faaauau le unai i atinae o taaloga, le atinae o suesuega i tomai eseese i totonu o aoga a le lotu ae faapea foi lana fesoasoani i vaega eseese o le sailiga o le tamaoaiga o Samoa.
O le Aso Toona na tea nei na amata ai polokalame o lenei vaiaso tāua ma o se tagapolo na faatautaia i le malae tapolo i Faleata na faatautaia ai lea vaega muamua o fiafia.
O le Aso Sa na faatino ai se sauniga paia o le Misasa i le Maota o le Malisi i Mulivai auā le tatalaga aloaia o lenei faamoemoe ae o le aso ananafi na tatala ai e se tasi o tama tuai o le Malisi le Afioga i le Palemia, susuga Tuilaepa Lupesoliai Sailele Malielegaoi le faaaliga o tomai ma galuega eseese e pei ona faataunuuina i le Maota o le Kolisi a Sagato Iosefo, i Alafua.
O se faaaliga na maua ai le avanoa o le toatele e feiloai atu i le toatele o tama tuai ma teine tuai i galuega ma auaunaga eseese a le Malo, e lē gata i lea o i latou ua taulamua i le tele o atinae tau pisinisi i totonu o Samoa ma atunuu mamao.
O le asō lea e faatautaia ai i le afiafi a nanei se isi sailigatupe tele lava i faipelega o le a faatautaiga ai le Fale Taalo Numera 1 i Tuanaimato.
“O le silasila a le Alii Palemia i se auala e toe unai ai le taaloga o faipelega i le atunuu e pei ona sa iai i aso ua mavae, ua faatino ai lenei taamilosaga,” o se saunoaga lea a le Alii Peresetene o le Asosi a Tama ma Teine tuai o le Malisi o Peseta Kasiano.
“E pei lava ona silafia e pei lava o Felela a le Malisi na agai mai i Samoa ma amata faalauiloa lenei taaloga ma o le mafuaaga lena ua faaaogā ai le faamanatuina o lenei faalapotopotoga i lenei tausaga ua manatu ai e tāua foi le silasila i le toe faalauiloaina o faipelega i Samoa e ala i lenei vaiaso,” o se faaopoopo lea a Peseta.
O le po a nanei o le a faapea ona aofia ai ni laulau mo kamupani ma ofisa eseese i le atunuu ma e $1000 le tau o le laulau e nofoia e tagata e toavalu ma o le faamoemoe ina ia toatele nisi e agai atu e maimoaina paga eseese o lea tausinioga a nanei.
E tolu paga faapolofesa ma isi paga faaopoopo i lenei taamilosaga. O loo faapea foi ona fuafuaina se savali tele a le aoga i le Aso Tofi e amata mai lava i luma o le aoga i Mulivai ma agai atu i le Maota o le Malo i le Eleele Fou.
O le a faapea foi ona iai se aso taalo mo sui uma o le Malisi mai i fafo ma o latou aiga, o se faaaliga taleni a sui tuai uma aemaise o se siva tele mo lenei lava vaiaso faamanatu.
E to‘a 10,000 le aofai o tama ma teine tuai ua taumafai nei le komiti o loo faatinoa polokalame o le aso faamanatu ia mae‘a lenei taumafaiga, ua lesitala uma i le asosi ma e $100 e lesitala ai ona sui uma.
“O se luitau tele lenei a le aoga ae o le faatalauula i sui uma o le Malisi ina ia lesitala o latou suafa ma ia faaauau ai taumafaiga ina ia saga atinae aoga a le Malisi i totonu o le atunuu,” o se saunoaga lea a Masuisui Junior Pereira, o se tasi o sui o le komiti lenei o galuega a le Asosi i Samoa.
O le faamanatuga lenei o le a faapea foi ona tatala aloaia ai se nofoaga mo suesuega faasaienisi a le aoga i Mulivai, o se potu o computers ma se faletusi. O lenei galuega atoa e $1.5 miliona tala lona tau aofai ma o le faamoemoe ina ia mae‘a poiokalame o le vaiaso atoa lenei ua mafai ona iai se tupe faapea mo le totogi atoa o le galuega tele lenei a le asosi.
O le aso a taeao e tatala aloaia ai le galuega lenei ua fausia i le Felela Malisi i Mulivai.