A oo ina toe to manatu i se folauga mai i le taimi na faavaeina ai se faalapotopotoga, o se mafutaga poo se pisinisi foi, e mafai ona manatu ai le tele o mea na tutupu i lona faagasolo maiga seia oo ina faamanatuina ma le loto faafetai i le alofa o le Atua, e tusa ma lona agalelei ma lana faasinoga alofa auā pe ana lē aunoa lona faatasi mai, po ua lē mafai ona iloa ma vaaia le matagofie o le faataunuuina e tagata o ana feau ma ana galuega e ala i taleni ma agavaa.
O le afiafi o le Aso Tofi na faia ai se mafutaga faapitoa mo le faamanatuina ai o le 10 tausaga talu ona faavaeina mai le aoga maualuga lenei a le NZSE poo le New Zealand School of Education i Aotearoa nei.
O le tausaga 2004 na tatala aloaia ai le aoga lenei i le itu lagi i Sisifo o Aukilani ma faagasolo ai loa polokalame faaleaoaoga mo tagata lautele i le aotauina ai auā le faataunuuina o ni moemitiga mo le manuia o le lumanai ina ia lelei atoatoa le agavaa mo ni galuega.
Na saunoa le alii Pule sili o le aoga ma o ia foi lea na faavaeina (founder & owner) le aoga lenei, le susuga ia Brijesh Sethi, o se laasaga lelei tele ua ausia e le aoga ma e lei faigofie lona amata maiga, ona e tele lava ni faafitauli sa fai ma ponai‘a ma ni lavasa‘iga foi o le folauga ona o le naunau lava ina ia alualu pea i luma le lelei ma le manuia o le faatinoga o aoaoga ma tagata lautele.
E oo mai i le taimi nei ua matuā faateleina le alualu i luma o polokalame faaauau a le aoga, ua toatele ni tagata na latou faaaogāina foi lenei auaunaga, ua faaopoopo atili foi nisi mataupu aoaoina, aemaise o le faatupulaia pea o fuafuaga mamao a le aoga ma maua ai avanoa e mafai ona faavaeina nisi faleaoga i nisi vaega o le atunuu.
O lea la ua 3 nofoaga a le aoga ua iai nei faatasi ai ma polokalame faaauau, ma na saunoa le alii pule, e lē gata ai i Niu Sila nei lenei faamoemoe. O lea ua oo atu i se vaega o atumotu le aoga lenei ma e faamoemoe o le a mafai ona faaauauina ma faavaeina nisi lala o le aoga lenei i nisi atunuu i fafo atu o Niu Sila.
I lea po na molimauina ai ma faafofoga le au valaaulia ma i latou na auai atu i le talaaga matagofie na faailoa mai e le Pule sili ma na tuuina foi le avanoa i se tasi o alii aoga na ia faaaogāina lenei auaunaga na ia faailoa mai ai lona fiafia tele ona o le tele ma le lelei o lona ola aoaoina mai i totonu o le NZES ua mafai ai ona ia maua se galuega ua talafeagai lelei ma ona manaoga ma lana moemitiga.
Na ia faafetaia ai le alii Pule sili ma faiaoga ona o le lelei o le faatinoina o aoaoga ma polokalame faaauau ua maua ai le fiafia ma lona agavaa lelei e faatino ai lana galuega ua iai nei. O le folasaga a Brijesh na ia faamanino mai ai o le a faaopoopoina nisi mataupu e aotauina ai tagata lautele e agai atu i le aoga, ma ua na maua foi le fiafia ona ua iai nei sootaga vavalalata ma institutes poo iunivesite foi ua mafai ona agai atu i ai le auaooga mo le faaauauina ai o aoaoga mo tekeri ma level maualuluga atu pe a manaomia.
Ua tele fuafuaga lelei ua faataatitia ina ia mautinoa le aoaoina lelei o tagata lautele ma le talitonuga ia maua le agavaa tatau mo le sailiga o se galuega. O se mafutaga foi na maitauina ai le loimata maligi o le fiafia ma le faagaeetia aemaise lava o le faamanatuina o faamanuiaga vaaia e ala i molimau a students.
O le saunoaga faaiu a le alii Pule sili, le susuga Brijesh Sethi na ia faafetaia ai galuega lelei a tagata faigaluega uma ma faiaoga o lenei 10 tausaga ua mavae atu, ma ua sauni foi e faafeiloai atu i le folauga o le isi 10 tausaga o lumanai.
