E maua le malamalama i le Ola aoaoina lelei. O le sini autu lea sa faamamafaina i le vaiaso o le Polyfest o lenei tausaga.
E 64 aoga sa auai i le tauvaga lenei, ae 4 aso na faatautaia ai. O le Aso Lulu na tatala ai i tauvaga lauga a vasega Tausaga 9 – 11, Aso Tofi vasega Tausaga 12 ma le 13 i Tautalaga lē saunia.
O le Aso Faraile ma le Aso Toonai o aso ia o tauvaga mo aoga i siva, mauluulu, sasa, pese, ma isi vaega sa lautogia ai lea faamoemoe.
O le Polyfest foi o lenei tausaga ua faamanatuina faatasi ai ma le 40 tausaga talu ona faavae mai lenei polokalame i le tausaga e 1976.
O faamaumauga i le amataga o lenei tauvaga, e na o le 4 lava aoga sa amata mai ai, o le aoga a Aorere College, Kolisi o Magele, Seddon College ma Sir Edmund Hillary Collegiate i Otara, ae o le taimi nei ua telē se suiga ua agai i ai le toatele o aoga ua tauva.
O aso nei e 4 na matuā faatumulia ai le Stage a Samoa i aoga aemaise o mātua sa agai atu e lagolago aoga taitasi o loo aooga ai a latou fanau. E lē gata i lea o faleaiga sa faatauina ai taumafa Samoa faapea foi nisi o kamupani sa faatauina laei ma mea taulima Samoa.
O le Aso Faraile ma le Aso Toonai o aso ia na matuā faatumulia ai Manukau i le nofoaga o loo faataunuuina ai lea polokalame. Na mataalia le aufaigaluega i vaega eseese o le malae i le faasoasoani i taavale aemaise le faitotoa i le lolofi atu o tagata i le fia matamata, auā ua taunuu uma atu ai tagata eseese o le Pasifika.
O tulafono, e sā ona e taumafa tapaa i totonu o le lotoā e sā foi ona e alu atu ma sau faguvai e auina atu i totonu.
O le itu lava latou a Samoa e lei misi ai lava le lagolago a le alii faipule o Magele le Tofa Su‘a William Sio ma nisi o sui o le pati o le Labour, faapea foi le tamaitai ia Latafale Auvaa o loo avea ma Tuasala o Samoa NZ/Tausala o Samoa/Tausala o Motu o le Pasefika.
E tolu vaega na vaevaeina i ai le tauvaga a fanau aoga, o le tauvaga a aoga a tamaitai, aoga a tama faapea aoga e fefiloi ai tama ma teine. O le Aso Faraile e 18 aoga na tauva ai, ae sa tatala lava i aoga a tamaitai, ma le Aso Toonai e 13 aoga.
O vaega na togi agai i ai le tauvaga, o tamaitai – Ulufale, Pese o le Aso/Fuataimi, Sasa/Faaluma, Mauluulu, Taualuga/Taupou, Ulufafo ma le Togiga. O tama, e na o le lua lava vaega e eseese ai, o le Faataupati ma le Manaia i le latou taualuga, e faapena foi i aoga fefiloi ai tamaitai ma alii, e faaaogā uma lava e latou vaega uma o loo faatinoina e vaega e lua o loo muamua.
O faamasino lautogia sa nafa ma lenei faamoemoe, o le faletua ia Vini Lale Peteru, Faletua ia Patisepa Tuafuti, Afioga Muliagatele Vavao Fetui, Tofa Tauanuu Sealiimalietoa Perenise Tapu, Tofa Aumua Faatatau Samuelu, Afioga Taiivao Siniva Cruickshank faapea le faletua ia Christina Atoa Tapu.
O le silasila ma le maimoa a le atunuu i tapenaga a aoga taitasi, ua matuā maualuga le tulaga ua oo i ai fanau, aemaise o le tomai ma le poto o i latou sa nafa ma nei sauniuniga.
O mātua matutua ua iloa lelei lo latou titi faitama, e ala i le faalala i le aso atoa e tapuaia faiva o fanau, ua sola ai lava ma le mole o le manava ma le vevela o le la. Ae fiafia ai le au faifaleaiga ua alu faasolo atoa le taugata o latou meaai i le fia aai o tagata.
O le Aso Toonai na taualuga ai loa le faamoemoe o lenei tausaga, ma sa tapunia e le aoga a le Kolisi o Avondale i le latou faafiafiaga. O se tasi o aoga ua iloga le tulai mai i tausaga taitasi, ma o latou foi sa suipi i le tausaga ua mavae a o soifua mai le tamaitai ia Melaine Sagala o se tasi o poutu a le kolisi i le tulaga i faafiafiaga.
Na matuā misia e le kolisi lenei faiaoga finau mo tupulaga aooga o Samoa, ma le faatāuaina o measina a le atunuu.
O aoga la nei ua lautogia i lenei tausaga:
Aoga a Teine
1st – Auckland Girls Grammar
2nd – Baradene College
3rd – Kelston Girls College
Aoga a Tama
1st – St Paul’s College
St Peter’s College
2nd – Sacred Heart College
3rd – Kelston Boys College
Aoga a Tama ma Teine
1st – Mangere College
2nd – Manurewa High School
3rd – Avondale College
