O le mae‘a ai o sauniga i le afiafi o le Aso Sa ua mavae 29 o Mati, na fai toonai uma ai aiga o le alii o Anaseto Toso faapea aiga uo ma ē masani o le alii o Pokati Pio i le faleaiga o le Happy Days, e patipatia faatasi ai le faamanatuina o laua aso soifua.
Sa faapea foi ona auai atu ai ma nisi o sui o falefaigaluega o mātua o Anaseto ma sui o le Ekalesia o le Samoan Christian Universal Church mai Manurewa o loo lotu ma galue ai le susuga ia Pokati i le tofi teutupe.
O le susuga i le faafeagaiga ia Tusitelo Laukoko o le Ekalesia Siitia Keriso Mount Wellington (AOG) na taitaia le polokalame i le tatalo ma sosoo ai ma le faapaiaina o le keke, ae o le susuga ia Numela Fale sa faasoasoaina le polokalame (MC).
O le ki ma le faitotoa autu o aso faapenei o le taumafataga lea sa vaaia ai le kiu umi i totonu o le faleaiga i le toatele o i latou sa molimauina o laua aso soifua. O upu mulimuli o le aso na molimoli ai le agaga faafetai o le tamā ia Numela Fale e fai ma sui o aiga na lua i le susuga i le faafeagaiga ma le auvalaaulia sa auai i lea afiafi, faatasi ai ma le meaalofa na tauaao atu i le faafeagaiga sa nafa ma le taitaiina o le sauniga ma tala ai loa le filialii.
