Faamanatu Aso Maliu e Aoga Aso Sa EFKS Pulega i Saute

Na uluuluamātāfolau i loto ma finagalo o ē na potopoto ma le toatele o le pulega le aano tāua ma le feau faamomoiloto na momoli mai e Aoga Aso Sa taitasi a le EKFS Pulega i Saute, i le tuufaatasiga e faatino ai tala faaleagaga e faamanatu ai le maliu o lo tatou Alii Faaola i le Aso Toonai ua tuanai.

Atonu e moni e faamanatu i tausaga taitasi, peitai na toe faamanatu e alo ma fanau le faatāuaina pea o le loto faamagalo, lotomaualalo, ma le onosai, ae sili ona iloa tino ma manatunatu ai pea i le maliu fua o le Faaola ma tiga matuitui na oo ia Iesu i le satauro.

Ua lē gata i pese faaevagelia, ae faapea foi tala faaleagaga na fai sao ai Aoga Aso Sa uma a le pulega. I le molimauina o lea mafutaga na vaaia ai le mamalu o le Atua e ala i le mamalu o sauniga ma le galulue faatasi o faiaoga ma Aoga Aso Sa taitasi, e pulupululima i tiute ma tapenaga o lea aso faapitoa.

Tele laufofoga maligi na vaaia i lea aso, o faailoga vaaia o le lagona o le autū moni o le aso ma le momomo ae sili le ootia o loto i le toe faamanatuina o le taimi na faamalosi ai Iesu i ona soo e mataala i le tatalo ua lata mai le taimi e faalataina ai o ia. Talofa! i le lē talitonu o le ausoo e oo lava i le taimi ua tuuina ifo ai o ia i le tuugamau na foa i le papa.

O ni a‘oa‘oga e tomanatu ai pea ma toe fafagu e Aoga Aso Sa a le Pulega a Saute, ina ia faatuanai ni faaletonu i le va ma le isi uso a tagata ae savali i luma ma tuli se ‘ai auā e lei maliu fua Keriso e iai lava le taui o le galue a‘ia‘i, leai se faalogologotiga e faaeaina i le aso o le toe afio mai o Ia.

Na molimauina e le anoano o le au maimoa ma le Matagaluega EFKS lea mafutaga tuufaatasi.