Faamanatu 90 tausaga o le soifua o le tina matua ia Fialogo Faamatuainu

E ui ina mamao ma valavala  nofoaga, peitai sa lei tuua ai le agaga fia mafuta mai o alo ma fanau faapea aiga o le tina matua ia Fialogo Faamatuainu e fia molimauina le aso fiafia o si o latou tina matua. O se tasi o tina ua molimauina e le toatele o le Matagaluega EFKS a Kuiniselani fai mai e lē misi i se sauniga lotu i le tele o Aso Sa.
Sa matuai faatumulia le Community Hall i Logan Central i le Aso Toonai 14 o Setema na atofaina e faamanatuina ai le 90 tausaga (2 Setema 1923).
Na matuai maofa le aofia a o lealea leotele le siufofoga o le tina matua ia Fialogo Faamatuainu a o fai lana molimau i le agalelei o fanau aemaise le alofa tuutulu‘i o le Atua ua ia maua mai ai nei tausaga e tele. O Fialogo e mai alalafaga o Lufilufi, Lalomanu & Saleaumua.
Sa taitaia le sauniga puupuu e le tausimatagaluega le susuga ia Rev Matuu Leifi Fuataga (Metoisi Mt Gravatt) ae o le faafeagaiga EFKS Southside sa feagai ma le faamanuiaina o le keke le susuga ia Rev Petaia Tuifao e pei ona auai ma le faletua ia Sarai.
E toasefulutasi le nofoaalo, 61 fanau a fanau ae 102 i latou na tupuga mai i le tina ia Fialogo Faamatuainu. E toatele alo o le tina matua o loo i le galuega a le Atua sa auai mai e pei o Rev Dr Elia & Galoane Taase (EFAKS Nuuli Am Samoa), Rev Emosi & Taumaia Liaina faifeau (EFAKS LA USA) sa auai mai foi.
O le nofoaalo a le loomatua ma aiga: Fuatino & Rev Ioane Tupou (Peretania) pau lea o le tamaitai e le i auai mai. Ranila & Laufiso Tanuvasa Tanuvasa (Ueligitone NZ). Rev Isamaeli & Kuinivia Liaina (faifeau EFKS Logan East). Asomua Lamosa & Sialaneta Liaina Apineru & Saili Liaina Liaina (A‘oa‘o EFKS). Rev Emosi & Taumaia Liaina faifeau (EFAKS LA USA). Sa auai mai foi Pelepesite Liaina (maliu) Filemu & Luo Liaina (Inala), Saolotoga & Oli Liaina (NZ) sa auai mai foi. Susana & Peter Robinson.
O le susuga ia Rev Isamaeli Liaina sa fai ma fofoga o le aso, o se tasi foi o alo o le tina matua o loo galulue i le EFKS Logan East ma le faletua ia Kuinivia.
O le tofa ia Tavana Seuala sa feagai ma faaaloaloga auā se matū palapala mo le aufaigaluega a le Atua ma ē na potopoto.
Sa fai ma sui o le aulotu ma le auvalaaulia le susuga ia Ape Lemalu ona o le matagofie o  le aso ma ona teuga eseese, aemaise le taumafataga lava saunia sa tapenaina e le Uncle Sam’s Takeaway, le tofa ia Poulava Sam ma Lorna Matautia.