O le faamanatuina o le 90 tausaga o le soifua o le tamā ia Pousui, na vaaia ai le toatele o ona auaiga aemaise o lana fanau faapea fanau o lana fanau ua mafai ona mafuta faatasi ma patipatia le lelei o le Atua ma lana tausiga i si o latou tuaa.
Na auai uma i latou mai Ausetalia faapea i latou uma o loo nonofo i Niu Sila nei. O se aso lououā ma matagi, ae na lē tuua ai lava le faatumulia o le town hall i Otahuhu i le agai atu o ana uo matutua mai lana ekalesia Katoliko i Otara faapea ē masani e molimau faatasi nei tausaga e tele ua aulia e le tamā.
Na amata le polokalame i le sauniga lotu na taitaia e le Afioga ia Patele Andrew Atonio mai i Onehunga, ona sosoo ai lea ma le faafeiloaina o le mamalu o le auvalaaulia e le susuga i le tulafale alii ia Fiso Siaosi. O le afioga ia Letuala Fereti sa fai ma fofoga o le aso mo le faagasoloina o le polokalame, ae o le tofa ia Tui Vaeone sa tu tootoo i le taimi o faaaloaloga.
O le tofa ia Tuuu Tofaeono sa fai ma sui o le ekalesia ma le mamalu o le auvalaaulia e momoli le faafetai i le paia o aiga o le tamā e tusa ai ma le faamoemoe sa gapatia ai. Na vaaia le fiafia o alo o le tamā ia Pousui ina ua aulia e le tama le 90 o ona tausaga ae o loo malosi atoatoa pea lona tino.
O le fale‘aiga a le Continental Catering na latou saunia le taumafataga i lea aso, na momoli ai foi faamanuiaga a lana fanau o loo alala ma aumau i Ausetalia ma Niu Sila nei i le atoaga o le 90 tausaga o lona soifua.
