O le maualuga ma le matagofie o le faamanatuina o le aso soifua o le tina, o le mafutaga a lana fanau faapea fanau a lana fanau, ae lē gata i lea o ona auaiga na malaga mai i Ausetalia, Samoa, Ueligitone ma Kalaiesetete.
Ua fetaui lelei foi lona aso soifua ma le tumutumu o lona aiga i le latou Family Reunion o lenei tausaga.
O le afiafi o le Aso Faraile na maua ai le mafutaga fiafia a lenei aiga i le Memorial Hall i Magele, e patipatia faatasi ai le atoaga o le 85 tausaga o le soifua o le tina. O se aso na fuafua lelei e le fanau o loo aumau iinei e faailoa ai lo latou alolofa i le latou tina i lona aso fiafia.
O tamā ma tina matutua, o uo ma paaga, aemaise o le aiga na auai uma i lenei mafutaga, sa faapea foi ona auai ma le susuga i le faafeagaiga ia Rev Faleu Futi ma lona faletua. Na vaaia le matagofie o le Atua i le tulai ai o le susuga i le faafeagaiga ia Rev Togafiti Tuoaimalii mai le Ekalesia EFKS i le taitaiina o le sauniga faatasi ai ma le laugaina o le upu faauuina a le Atua.
Sa leai se gase poo se vevesi i le solosolo lelei ma le faatoeaina o fika a le MC i lea po, le tofa ia Talafaaifo Salesa Futi.
O le faapaiaina o le keke na tatalo ai lava le taitai o le sauniga. O le sini autu ma le matagofie o lea aso, o le taumafataga na saunia e le fanau, lea na maitauina ai laufofoga fiafia o le aukuka ma le tele o taumafa eseese sa fefiloi ai lea afiafi.
Sa taualuga lea afiafi i upu mulimuli a le Fofoga o le po, i lana faafetai i aiga ma uo sa auai faatasi ai ma le faafetai faapitoa i le taitai o le sauniga, ae faapea foi ma se meaalofa tupe e talimasineia ai le galuega sa ia faia. Ae na toe saunoa faamavae le faafeagaiga ma momoli ai lana faafetai i aiga na lua e tusa ai ma le faaaloalo, ma faaiu ai loa i le tatalo ma tala ai loa le filialii.
