O le aso 5 o Fepuari sa potopoto ai alo ma fanau a le tina matua ia Manuu Iliafi Va‘ele e siitia se taulaga faafetai i le Atua ona ua mafai e si o latou Tina matua ona laasia le 84 o tausaga o lona soifua.
E lei mafai ona auai le toatele o aiga lautele ae na o le nofoaalo lava ma fanau. Na o latou molimauina le tāua o galuega lelei a si o latou Tina ua afua ai ona o latou aeaeina nei manuia e tele aemaise le tau fafauina mai o le fatuaiga sa lei faigofie ae o lenei ua ea ma iu i se taunuuga lelei. O lea e sii ai pea le faafetai i le Atua ona o loo Ia tausia pea le Tina i ona aao agalelei. Ia alofa le Atua ma ia saga tului nisi tausaga se tele mo oe Tina Manuu Iliafi Va‘ele (Fatausi Safotulafai, Matautu Falealili ma Samauga) auā le mafutaga i luga o lenei fogaeleele. Faafetai mo au galuega lelei ae o alofaaga e lē mafai ona mavae mo oe le Tina.
Alofaaga ma faamanuiaga e auina atu i ou aiga i Niu Sila, Samoa ma Ausetalia. E viia le alofa ma le agalelei o le Atua ua mafai ona ia faaopoopo nei tausaga e tele i lou soifua Tina.
E toaono le nofoaalo, Piula Petersen, Faatolosisi Polelei, Susana Meleisea, Tuilagi Motutoa Va‘ele, Pasefika Setu ma Sinapati Fuialo, o loo aumau uma i Brisbane.
