Faamanatu 80 tausaga o Tuiavii Maugaloa

Tina ia Tuiavii Maugaloa (ogatotonu pito i luma) ma ona alo e toalua ia Tofa Galumalemana Sualauvi Su‘a Aloese ma lona tuafafine o Lealaisalanoa Eseta Su‘a Aloese (ogatotonu pito i tua) ma nisi o le auvalaaulia sa auai
Tina ia Tuiavii Maugaloa (ogatotonu pito i luma) ma ona alo e toalua ia Tofa Galumalemana Sualauvi Su‘a Aloese ma lona tuafafine o Lealaisalanoa Eseta Su‘a Aloese (ogatotonu pito i tua) ma nisi o le auvalaaulia sa auai

Ua 80 tausaga o le soifua o le tina matua ia Tuiavii Maugaloa Tofa Matafeo Su‘a Aloese, lea sa patipatia e ona aiga uo ma ē masani aemaise o lana Ekalesia Aso Fitu Samoa Tutoatasi, ile faamanatuina o lona Aso Soifua i le Commuity Hall i Kelston i le afiafi o le Aso Gafua, 6 Iuni 2016. O se po fiafia i uso ma tuagane o le tina ia Tuiavii Maugaloa faapea fanau ona ua maua lea avanoa e toe feiloai ma mafuta faatasi ai i totonu o le aiga.

O lona alo tama le Tofa Galumalemana Sualauvi Su‘a Aloese sa fai ma fofoga o le po e faatulima i le paia ma le mamalu o le auvalaaulia sa auai, ae o le susuga ile faafegaiga ia Pastor Meki Fesolai o le Ekalesia Aso Fitu Samoa Tutoatasi i Magele, na mānavaina le upu faamalosi ma le agaga faafetai ile Atua ile tele o tausaga ma aso ua foai i le soifua o le tina. O le tumutumu ai o aiga, o uo ma ē masani aemaise o le felanulanuai o aitema na saunia i lea po, na faateia ai le tina ile matagofie o tapena na saunia mo lona aso fiafia.

O le sagisagi fiafia mai o ona aiga, ona e lē o mafai ona galo ia i latou uma galuega lelei sa ia faia. O ia sa ia aumaia uma tagata o le aiga o lona tamā ma lona tina i Niu Sila e saili manuia ai.

Talaaga Puupuu i le Soifua o le Tina

O Tuiavii Maugaloa o le ulumatua o le fanau e 16 a le tama ia Tofa Matafeo Su‘a Aloese ma le tina ia Aolele Tuimalealiifano Faaoloii mai le afioaga o Saipipi, Asaga, Sili ma Falelatai.

E toalua ona alo, e tasi le tama le afioga ia Tofa Galumalemana Sualauvi Su‘a Aloese ma lona tuafafine ia Lealaisalanoa Eseta Su‘a Aloese. Sa aoga i le aoga faafaiaoga i Samoa ma malaga mai o ia i Niu Sila ile tausaga e 1962, ma faigaluega ai ile faleoloa o le Farmer Store ile City, ma fesoasoani ile tausiga o lona aiga i Samoa. E 38 i latou sa tupuga mai i lenei tina ma o se aiga ua uluola ma ua manuia foi galuega a le fanau.

O lana galuega mulimuli sa avea ai ma failautusi o le Pule Faatonu ile Matagaluega o Galuega (Ministry of Work) ile tele o tausaga ma malolo litaea ai ua matua lona soifua.

O se tina sa tupuga mai i se aiga e tulelei ona tagata ona sa galulue ona tuaa ile faleoloa o Nelesoni i tausaga ua mavae, lea lava ua tafe mai ai lea manuia ua faamanuia ai ma lana fanau faapea fanau a lana fanau.

Na faaiuina lea afiafi fiafia ile taumafataga tele sa saunia e le Continental Catering, auā le taliga o le sua ile valaaulia, faapea aiga uo ma ē masani na faatasi atu.